गाउँ सहर

पशुपति मन्दिर क्षेत्र वरपर मासु, मदिरा तथा नसालु पदार्थ बेच्न प्रतिबन्ध

• गाउँ सहर संवाददाता
• २२ फाल्गुण मंगलबार, २०८० | १०:५९:०० मा प्रकाशित

काठमाडौं । महाशिवरात्री पर्वलाई लक्षित गरेर पशुपति मन्दिर आसपास क्षेत्रमा मासु, मदिरा तथा नसालु पदार्थ बेचबिखन गर्न रोक लगाएको छ । 

जिल्ला प्रशासन कार्यालय काठमाडौंले एक सूचना जारी गर्दै पशुपति मन्दिर आसपासका क्षेत्रमा पाँच दिन मासु, मदिरा र अरु नसालु पदार्थ उत्पादन, बेचबिखन, ओसारपसार, भण्डारण र सेवन गर्न रोक लगाइएको हो । 

बुधबारदेखि गौशाला मित्रपार्क सडकदेखि पूर्व, पशुपति क्षेत्रको पूर्व सिमानादेखि पश्चिम, गौशाला तिलगंगा चक्रपथदेखि उत्तर, मित्रपार्क–उमाकुण्ड–गौरीघाट हुँदै गुह्यश्वरीदेखि दक्षिणभित्रका सबै भागमा रोक लगाइएको प्रमुख जिल्ला अधिकारी जितेन्द्र बस्नेतले जानकारी दिए ।

स्थानीय प्रशासन ऐन, २०२८ को दफा ६ को उपदफा (३) बमोजिम पूर्णरूपमा रोक लगाइएको जनाइएको छ । साथै प्रशासनले महाशिवरात्री पर्वलाई अनुशासित, मर्यादित तथा व्यवस्थित बनाउन समेत आग्रह गरिएको छ ।