वातावरण

धोबीखोलामा फोहोर फाल्ने कम्पनीलाई महानगरले २५ हजार जरिवाना

• गाउँ सहर संवाददाता
• २७ असार सोमबार, २०७९ | १९:०४:०० मा प्रकाशित

 

काठमाडौं । राजधानीको रातोपुल क्षेत्रमा धोबीखोलामा डोजर लगाएर फोहोर फाल्ने प्राक्टिकल वेष्ट सोलुसन प्रालिलाई काठमाडौं महानगरपालिकाले २५ हजार रुपैयाँ जरिवाना गरेको छ।

सामाजिक सञ्जालमा डोजरले धोबीखोलामा फोहोर फालिरहेको भिडियो र फोटोको भाइरल भइरहेको थियो। सोपछि काठमाडौं महानगरपालिकाले तथ्य अध्ययन र छानविन गरेपछि उक्त कार्यमा संलग्न कम्पनीलाई नियमअनुसार २५ हजार रुपैयाँ जरिवाना भएको महानगरले जनाएको छ। जरिवाना गरेको रकम कम्पनीबाट महानगरले अशुल समेत गरिसकेको छ।

साथै, महानगरले यस्ता कुनै पनि गतिविधिहरु कसैले पनि नगर्न र कसैले गरेमा त्यसप्रति सबै चनाखो रहन आवश्यक रहेको बताएको छ। यसैगरी महानगरले यस्ता कार्यहरु सार्वजनिक गरेर महानगरसम्म पुर्‍याइदिने जनातालाई धन्यवाद समेत व्यक्त गरेको छ।

आगामी दिनहरुमा यस्ता कार्य नदोहोर्याउन र गरेको देखेमा यसरी नै सार्वजनिक ध्यानाकर्षणमा ल्याइदिन पनि नगरबासीलाई महानगरले अनुरोध गरेको छ।