स्वास्थ्य

काठमाडौं उपत्यकामा हैजाका बिरामी दिनहुँ थपिँदै, खानेकुरामा ध्यान दिन अनुराेध

• गाउँ सहर संवाददाता
• २४ असार शुक्रबार, २०७९ | १२:५१:०० मा प्रकाशित

काठमाडौ । काठमाडौं उपत्यकामा हैजा संक्रमितको संख्या २६ पुगेको छ । असार २ गतेदेखि देखिएको हैजा संक्रमण बिहीबारसम्म आइपुग्दा २६ जनामा पुष्टि भएको इपिडिमियोलोजी तथा रोग नियन्त्रण महाशाखाले जनाएको छ । 

महाशाखाका अनुसार कागेश्वरी मनोहरा नगरपालिकाको मूलपानी क्षेत्र हैजाको रेड जोनमा रहेको छ । नगरपालिकाको वडा नम्बर ४,६, ७ र ९ मा गरी ८ जनामा हैजा संक्रमण देखिएको छ । त्यस्तै, काठमाडौं महानगरभित्र ११ जना, चन्द्रागिरी नगरापालिकामा २, कीर्तिपुरमा १ र बूढानीलकण्ठमा १ जनामा हैजा संक्रमण पुष्टि भएको छ । 

त्यस्तै, भक्तपुरको चाँगुनारायण नगरपालिकामा १ र ललितपुर महानगरपालिकामा २ जनासहित उपत्यकामा हैजा संक्रमितको संख्या २६ पुगेको महाशाखाले जनाएको छ । हैजा संक्रमणबाट बच्न उमालेर मात्रै पानी पिउन तथा खानेकुरा र सरसफाइमा विशेष ध्यान दिन महाशाखाको अनुरोध छ ।