गाउँ सहर

हिमाल, पहाड र तराई–मधेसका अधिकांश स्थानीय तहमा निर्वाचन सफलतापूर्वक सम्पन्न

काठमाडौँ। शुक्रबार बिहान ७ बजेदेखि अपरान्ह ५ बजेसम्म एकै चरणमा भएको स्थानीय तह निर्वाचन छिटपुट घटनाबाहेक देशभर शान्तिपूर्ण र उत्साहजनक रूपमा सम्पन्न भएको छ। काठमाडौं उपत्यकासहित हिमाल, पहाड र तराई–मधेसका अधिकांश स्थानीय तहमा निर्वाचन सफलतापूर्वक सम्पन्न भएको हो।

निर्वाचन आयुक्त इश्वरीप्रसाद पौड्यालले निर्वाचनलाई अति उत्साहजनक भन्न सकिने अवस्था नभएको बताए। यो निर्वाचनलाई  सामान्यरूपमा नै लिएको बताए।

आयुक्त पौडेलले भने, ‘‘कतिपय स्थानमा सुरक्षाको कमी भएको अनुभव गरिएको छ, २०७४ सालको निर्वाचनमा यस्तो अवस्था आएको थिएन। विभिन्न स्थानमा मतदान अवरुद्ध भएको छ, आयोगलाई २.३० बजेसम्म प्राप्त विवरणमा ३९ स्थानमा मतदान रोकिएको छ, कतिपय ठाउँमा पुनः सुरु भएको पनि हुनसक्छ।’’

वि.सं. २०७४ मा तीन चरणमा स्थानीय तह निर्वाचन भएको थियो। आयोगमा रहेको संयुक्त निर्वाचन परिचालन केन्द्रमा २:३० बजेसम्मको विवरणमा जम्मा ३९ स्थानमा मतदान स्थगित भएको छ। आयुक्त पौडेलका अनुसार, आयोगले बिहान ७ देखि ५ बजेसम्म मतदानको अवधि तोकिए पनि ५ बजेभित्र मतदान स्थलभित्र प्रवेश गरेका मतदाताले आज ८-९ बजेसम्म पनि मतदान गर्नेछन्।

गाउँ सहर संवाददाता