गाउँ सहर

संसद् भवनअगाडि शंकास्पद वस्तु राखेको आरोपमा यी युवक पक्राउ

 

काठमाडौं । काठमाडौंको नयाँ बानेश्वरस्थित संसद् भवनअगाडि शंकास्पद वस्तु राखेको आरोपमा एकजना पक्राउ परेका छन् ।

महानगरीय अपराध महाशाखाको टोलीले गए राति अनेरास्ववियु क्रान्तिकारीका पशुपति बहुमुखी क्याम्पसका अध्यक्ष सुवास महतलाई पक्राउ गरेको हो । काभ्रेको भुम्लु गाउँपालिका–२ का उनी हाल चाबहिलमा बस्दै आएका थिए ।

केही दिनअघि संसद् भवनअघि शंकास्पद वस्तु फेलापरेको थियो । प्रेसरकुकरमा ‘नो एमसीसी’ लेखेर राखिएको उक्त वस्तु बम भने नभएको नेपाली सेनाको बम डिस्पोजल टोलीले जानकारी दिएको थियो ।

एमसीसी संसदबाट पारित भएपछि त्यसको विरोधमा सोमबार गरिएको नेपाल बन्दको क्रममा संसद भवनअगाडि ‘बम’ राखिएको थियो । प्रेसर कुकरमा ‘नो एमसीसी’ लेखेर राखिएको संकास्पद बस्तु नेपाली सेनाले डिस्पोज गरेको थियो । डिस्पोजका क्रममा कुकरभित्र प्लास्टिक र कागज पाइएको थियो ।

गाउँ सहर संवाददाता