राजनीति

रामेछाप कांग्रेसका यी प्रतिनिधिहरू बागमती प्रदेश सदस्यमा विजयी भए (मतपरिणासहित)

• गाउँ सहर संवाददाता
• २२ मङ्सिर बुधबार, २०७८ | २१:३२:०० मा प्रकाशित

काठमाडाैं । नेपाली कांग्रेसको १४औँ महाधिवेशनअन्तर्गत बागमती प्रदेशको निर्वाचनमा विभिन्न पदमा उम्मेद्वार दिएका रामेछापका ६ जना प्रतिनिधि निर्वाचित भएका छन् । 

रामेछापबाट पदाधिकारीसहित प्रदेश सदस्यमा १२ जनाले उम्मेद्वारी दिएका थिए । जसमध्ये ६ जना निर्वाचित भएका हुन् । 

निर्वाचित हुनेहरूमा प्रदेशसभा खुला पुरूषमा महाधिवेशन प्रतिनिधि अर्जुन कुमार केसी (७५३), प्रदेश प्रतिनिधि उज्जलराम घिमिरे (७०८), प्रदेश प्रतिनिधि भीमसेन बस्नेत (६६९) विजयी भएका छन् । खुलाबाट १५ जना उच्च मत ल्याउने विजयी हुनेमा रामेछापबाट उम्मेद्वारी दिएका तीनै जनाले विजय प्राप्त गरेका छन् । 

भूगाेल पुरूषतर्फ प्रदेश प्रतिनिधि जितबहादुर मगर (९६३) विजयी भए भने उनका प्रतिस्पर्धी प्रदेश प्रतिनिधि नारायण प्रसाद भट्टराईले (७९२) मत प्राप्त गरे । 

महिलातर्फ प्रदेश प्रतिनिधि कल्पना खड्का (८२६) विजयी भइन् भने प्रतिस्पर्धी महाधिवेशन प्रतिनिधि गंगा अधिकारीले ७१९ र अर्की उम्मेद्वार महाधिवेशन प्रतिनिध रामकुमारी डाँगी (श्रेष्ठ) ले २०९ मत प्राप्त गरेकी छन् ।

दलित खुला सदस्यमा महाधिवेशन प्रतिनिधि बलबहादुर दमाइले जित हासिल गरे । उनका प्रतिस्पर्धी डिलबहादुर परियारले ६७८ मत ल्याए ।

६ जनामात्र विजयी हुने खस आर्य महिला सदस्यमा उम्मेद्वारी दिएकी प्रदेश प्रतिनिधि शकुन्तला त्रिपाठीले ७०७ मत ल्याइन् तर विजयी हुन सकिनन् । 

त्यसैगरि खस आर्य खुला सदस्यका उम्मेद्वार दिएका प्रदेश प्रतिनिधि सुजन ढुंगेलले ६९४ मत ल्याएपनि विजयी हुन सकेनन् । 

त्यसाे त रामेछापबाट पदाधिकारीमा उम्मेद्वारी दिएका एक मात्र उम्मेद्वार महाधिवेशन प्रतिनिधि बीरबहादुर तामाङले झिनाे मतले पराजित हुनुपरेकाे छ । जगदीश्वरनरसिंह केसीकाे समूहबाट सहमहामन्त्री पदमा उम्मेद्वारी दिएका तामाङ जम्मा ४ मतले पराजित भएका छन् । उनले ८३५ मत ल्याएका थिए भने विजयी हुने हरि शरण श्रेष्ठले ८३९ मत ल्याएका थिए ।