गाउँ सहर

१८ लाख मूल्यबराबरको अवैध सामान बरामद

• गाउँ सहर संवाददाता
• १९ मङ्सिर आइतबार, २०७८ | १५:४७:०० मा प्रकाशित

रुपन्देही । प्रहरीले १८ लाख मूल्यबराबरको अवैध सामान बरामद गरेको छ । जिल्ला प्रहरी कार्यालयबाट खटिएको प्रहरी टोलीले रुपन्देहीको बुटवल उपमहानगरपालिका(२ स्थित तिनाउ पुलबाट भन्सार छलेर ल्याइएको अवैध जुत्तासहित एक व्यक्तिलाई नियन्त्रणमा लिएको हो ।

रुपन्देहीको सैनामैना नगरपालिका(४ मुर्गिया बस्ने ३२ वर्षीय विष्णु थारुले कपिलवस्तुबाट बुटवल ल्याउँदै गरेको लु१च ८२१३ नम्बरको बोलेरो पिकअप जिप चेकजाँच गर्ने क्रममा प्रहरीले जिपभित्र २५ कार्टुन अर्थात् ७५० जोर अवैध जुत्ता फेला पारेको हो । बरामद सामानको मूल्य करिब १८ लाख रहेको र चालक, जिपसहित बरामद सामानलाई आवश्यक कारबाहीका दलागि बेलहिया भन्सार कार्यालय पठाइएको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक नवरत्न पौडेलले जानकारी दिएका छन् ।

यसैबीच प्रहरीले लागूऔषसहित एकजनालाई रुपन्देहीबाट पक्राउ गरेको छ । वडा प्रहरी कार्यालयबाट खटिएको टोलीले बुटवल उपमहानगरपालिका(७ दीपनगर बस्ने सुनिल गौचनलाई लागूऔषधसहित पक्राउ गरेको जनाएको छ ।

गौचनको घरमा खानतलासी गर्दा प्रहरीले कोठाभित्र रहेको स्टिलको दराजमा राखिएको सेरिज्याक १३ एम्पुल, नुफिन १३ एम्पुल, फेनरागन १३ एम्पुल, सिरिन्ज १२ थान र विभिन्न किसिमका मोबाइल तीन थान बरामद गरेको हो । 

पक्राउ परेका गौचनमाथि थप अनुसन्धान भैरहेको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक नवरत्न पौडेलले बताएका छन् ।