वातावरण

देशैभर चिसाे बढ्याे, न्यून चापकाे असर पूर्वमा, शनिबारकाे माैसम यस्ताे छ

• गाउँ सहर संवाददाता
• ११ मङ्सिर शनिबार, २०७८ | ०९:०९:०० मा प्रकाशित

काठमाडौँ । बंगलादेश आसपासमा रहेको न्यून चापीय प्रणालीको आंशिक प्रभाव नेपालको पूर्वी क्षेत्रमा परेको छ । शनिबार बिहान प्रदेश १, बागमती र गण्डकीका पहाडी भूभागमा बदली छ ।

तराईमा तुवाँलो लागेको छ । विमानस्थलमा माैसमका कारण उडान डिले हुन थालेका छन् ।

जल तथा मौसम पूर्वानुमान महाशाखाका अनुसार पछिल्ला दिनमा काठमाडौँ उपत्यकासहित मुलुकभर चिसो बढ्न थालेको छ । पछिल्लो २४ घण्टामा काठमाडौँको न्यूनतम तापक्रम ८.८ डिग्रीसेल्सियसमा झरेको छ । सबैभन्दा कम तापक्रम माइनस २.८ डिग्री रहेको छ ।

शनिबार दिउँसो प्रदेश १, बागमती, गण्डकी तथा लुम्बिनीका पहाडी भूभागमा बदली रहनेछ भने ती क्षेत्रका एक/दुई स्थानमा हल्का वर्षाको सम्भावना छ । प्रदेश १, बागमती प्रदेश, गण्डकी र सुदूरपश्चिमका उच्च पहाडी तथा हिमाली भूभागमा हिमपातको सम्भावना छ ।

राति प्रदेश १ र बागमतीका एक/दुई स्थानमा हल्का वर्षाको सम्भावना छ ।