राजनीति

कांग्रेस शिला खोज्नुपर्ने भनेका बस्नेतलाई देउवाकाे चुनाैती : दुर्लभ थापालाई चुनाव हराएर देखाउनुस्

• गाउँ सहर संवाददाता
• १८ भदौ शुक्रबार, २०७८ | १४:०४:०० मा प्रकाशित

काठमाडौं । नेपाली कांग्रेसका सभापति एवं प्रधानमन्त्री शेरबहादुर देउवाले एमाले सांसद महेश बस्नेतलाई फेरि भक्तपुरमा निर्वाचन जित्न चुनौती दिएका छन् ।

वडा अधिवेशन उदघाटन गर्न सूर्यविनायक पुगेका देउवाले एमाले नेता बस्नेतलाई भक्तपुरका कांग्रेस नेता दुर्लभ थापालाई हराउन चुनौती दिए ।

देउवाले भने, ‘कांग्रेस सशक्तरूपमा अघि बढेको छ । महेश बस्नेतजीले मलाई चुनाव लड्न चुनौती दिएछन् । बस्नेतजीले मलाई होइन भक्तपुरबाट हाम्रो पार्टी सभापति दुर्लभ थापालाई चुनाव हराएर देखाउनुस् ।’

स्वास्थ्य मापदण्ड पालना गरी अधिवेशन गर्न देउवाले कार्यकर्तालाई सुझाएका थिए । देउवाले सम्भव भएसम्म सर्वसम्मत प्रतिनिधि चयन गर्न स्थानीय कार्यसमितिलाई अनुरोध गरेका थिए ।

२२ वडामा हालसम्म सर्वसम्मत क्षेत्रीय प्रतिनिधि चयन भएका छन् । अन्यमा पनि सर्वसम्मत गर्ने प्रयास छ ।

कांग्रेसको वडा अधिवेशन आजबाट सुरु भएको छ । क्रियाशील सदस्यताको सूची प्रकाशित भएका ५६ मध्ये धेरै जिल्लाको अधिवेशन आज भइरहेको छ ।

भक्तपुर क्षेत्र नम्बर २ मा बस्नेतले २०७४ सालको आम निर्वाचनमा कांग्रेस नेता तथा पूर्वसभामुख दमननाथ ढुंगानालाई दोब्बर मतान्तरमा पराजित गरेका थिए । केही दिनअघि उनले भक्तपुरमा अब कांग्रेस शिला खोज्नुपर्ने भन्दै सभापति देउवालाई आफूसँग चुनाव लड्न चुनौती दिएका थिए ।