गाउँ सहर

चन्द्र ढकालले दिए धितोपत्र बोर्डको सदस्यबाट राजीनामा

काठमाडौं । नेपाल धितोपत्र बोर्डको सदस्यबाट चन्द्र ढकालले राजीनामा दिएका छन् । उनी नेपाल उद्योग वाणिज्य महासंघका तर्फबाट बोर्ड सदस्य बनेका थिए ।

ढकालले अध्यक्ष गोल्छालाई पत्र लेखेसँगै महासंघले धितोपत्र बोर्डलाई ढकालको ठाउँमा अर्कै प्रतिनिधि पठाउने भन्दै पत्राचार गरेको छ ।

आफूले महासंघमार्फत नै धितोपत्र बोर्डबाट राजीनामा दिएको ढकालले बताए । धेरै पब्लिक कम्पनीमा आफूआवद्ध रहेको र आफ्ना संस्थाहरुको मर्जरको कुरा आउँदा समस्या हुने भएकाले राजीनामा दिएको उनको भनाइ छ ।

आज बुधबारकै मितिबाट लागू हुने गरी उनले राजीनामा दिएका हुन् । सर्वोत्तम सिमेन्टको सेयर प्रकरणमा मुछिएका नेपाल स्टक एक्सचेन्जका प्रमुख कार्यकारी अधिकृत चन्द्रसिंह साउदले हिजो मात्रै राजीनामा दिएका थिए । यस प्रकरणमा ढकालको नाम पनि जोडिएको थियो ।

बुक बिल्डिङ विधिबाट धितोपत्रको सार्वजनिक निष्कासन गर्ने लागेको सर्वोत्तम सिमेन्ट सेयर खरिद प्रकरणमा बोर्डका अध्यक्ष भीष्मराज ढुंगाना, सञ्चालक ढकाल र नेप्सेका सीईओ चन्द्रसिंह साउद विवादमा मुछिएका हुन् ।

बोर्डका अध्यक्ष ढुंगानाको छोरी रेविका ढुंगाना, बोर्ड सञ्चालक ढकालका भाइ हेमराज ढकाल र नेप्सेका सीईओ साउदले श्रीमती सुशीलाकुमारी बोहराको नाममा नेप्सेको ओटीसी बजारमार्फत ०७७ माघ २६ गते सेयर खरिद गरेका थिए । सोही प्रकरणमा नेप्सेका सीईओ साउदले राजीनामा दिइसकेका छन् । 

गाउँ सहर संवाददाता

तपाईँको मत