दृष्‍टिकोण

विपन्न वर्ग कर्जाः शिर्षकमा सीमित नहाेस्

• गाउँ सहर संवाददाता
• ३० श्रावण शनिबार, २०७८ | १४:४८:०० मा प्रकाशित

काठमाडाैँ । नयाँ माैद्रिक नीति सार्वजनिक भएकाे छ । माैद्रिक नीतिले कोभिड–१९ को कारण पर्यटन क्षेत्रमा रोजगारी गुमाएका व्यक्ति स्वरोजगार हुनेगरी व्यवसाय सञ्चालन गर्न प्रवाह हुने रु. १५ लाखसम्मको कर्जालाई विपन्न वर्ग कर्जामा गणना गरेकाे छ ।

साथै ऋणी स्वयम् रोजगार हुने उद्देश्यले सवारी साधन खरिद गर्न प्रवाह हुने रु. २५ लाखसम्मको कर्जालाई विपन्न वर्ग कर्जामा गणना गर्न सक्ने व्यवस्था मिलाएकाे छ ।

नीतिले महिला उद्यमीद्वारा लघु उद्यम तथा स्वरोजगारमूलक व्यवसाय सञ्चालन गर्न परियोजनाको धितोमा प्रवाह हुने रु. २० लाखसम्मको कर्जालाई विपन्न वर्ग कर्जामा गणना हुने व्यवस्था गरिनेछ । यस्तो कर्जाको अनिवार्य रुपमा बीमा गर्नु पर्ने व्यवस्था मिलाएकाे छ ।

वास्तविक कृषि व्यवसायीलाई रु. २० लाखसम्म कृषि व्यवसाय सञ्चालन गर्न परियोजनाको धितोमा प्रवाह हुने कर्जालाई विपन्न वर्ग कर्जामा गणना हुने व्यवस्था गरिने उल्लेख गरेकाे छ । यस्तो कर्जाको अनिवार्य रुपमा बीमा गर्नु पर्ने व्यवस्था मिलाइने नीतिमा उल्लेख छ ।

विभिन्न शिर्षकमा कर्जा प्रवाह सहि नभएकाे भन्दै गुनासाे बढिरहेकाे बेला विपन्न वर्ग कर्जा लक्षित वर्गले पाउलान ? भन्ने प्रश्नहरूले बजार तताइसकेकाे छ । यसमा सबैले चनाखाे हुनुपर्ने जानकारहरू बताउँछन् ।