अर्थतन्त्र

७९ अंकले बढ्याे नेप्से परिसूचक, काराेबारमा रि–इन्स्योरेन्स कम्पनी अग्रस्थानमा

• गाउँ सहर संवाददाता
• ८ असार मंगलबार, २०७८ | १५:३२:०० मा प्रकाशित

काठमाडाैं । मंगलबार शेयर बजार परिसुचक नेप्से उच्च अंकले बढेकाे छ । नेपाल धितोपत्र बोर्डको विज्ञप्तिका कारण लगातार ओरालो लागेको नेप्से परिसूचक यसदिन ७९.४३ अंकले बढेर २९१३.८४ विन्दुमा पुगेको छ ।  यसअघि आइतबार र सोमबार दुई दिनमा नेप्से एक सय ३४ अंकले घटेको थियो ।

नेप्सेका अनुसार आज ६ कम्पनीको शेयरमूल्यमा सकारात्मक सर्किट लागेको  छ । आज सर्किट लाग्ने कम्पनीहरुमा अपी हाइड्रोपावर, जनकी फाइनान्स, बरुण हाइड्रोपावर कम्पनी, हाइड्रो इलेक्ट्रोसीटी एण्ड इनभेष्टमेन्ट कम्पनी, ङादी ग्रुप पावर कम्पनी र पञ्चकन्यामाइ हाइड्रोपावर कम्पनी रहेका छन् । 

 

यसदिन १ करोड ९७ लाख ७० हजार ६३८ कित्ता सेयर १० अर्ब २८ करोड ६२ लाख ६९ हजार ९५७ रुपैयाँमा कारोबार भएको छ । आज २०१ वटा कम्पनीको सेयर मूल्य बढ्दा १५ वटा कम्पनीको सेयर मूल्य घटेको छ । त्यसैगरी ९ वटा कम्पनीको सेयर मूल्य स्थिर छ ।

यो दिन सव इन्डेक्सतर्फ विकास बैंक र फाइनान्स ५.७७ प्रतिशतले बढेको छ भने जलविद्युतको सव इन्डेक्स ५.४७, होटल तथा पर्यटन ३.२८ प्रतिशत, लगानी उपसमूह ४.२६ प्रतिशतले वृद्धि भएको छ ।

त्यसैगरी गुमाउने शीर्ष कम्पनीमा एसबीएल डिबेञ्चर, एनआइसी एसिया डिबेञ्चर, गोर्खाज फाइनान्स, कुमारी इक्विटी फन्ड र लक्ष्मी इक्विटी फन्ड छन् ।

कारोबारको आधारमा आज सबैभन्दा बढी नेपाल रि–इन्स्योरेन्स कम्पनीको भएको छ । यस कम्पनीको एक अर्ब ४९ करोड ३२ लाख ५३ हजार ७१२ बराबरको शेयर कारोबार भएको छ ।