गाउँ सहर

पर्यटन क्षेत्र थला परेपछि नेपाल भित्रिने विदेशी लगानी ३२ प्रतिशतले घट्यो

काठमाडाैं । कोरोना सङ्क्रमणका कारण पर्यटन क्षेत्र थला परेपछि त्यसको प्रत्यक्ष असर नेपाल भित्रिने विदेशी लगानीमा परेको छ । जसको परिणामस्वरूप सन् २०२० मा नेपालको विदेशी लगानी ३२ प्रतिशतले खुम्चिएर १४ अर्ब ७४ करोड रुपियाँमा सीमित भएको छ ।

संयुक्त राष्ट्रसङ्घीय व्यापार तथा विकास सभा (अङ्कट्याड)ले सोमबार सार्वजनिक गरेको विश्व लगानी प्रतिवेदन २०२१ अनुसार अन्य आर्थिक गतिविधिसँग पनि जोडिएको पर्यटन क्षेत्र प्रभावित हुँदा विदेशी लगानी प्रभावित भएको हो ।

प्रतिवेदनअनुसार सन् २०१९ मा भने नेपालले उच्च विदेशी लगानी प्राप्त गरेको थियो । उक्त वर्ष नेपालले २१ अर्ब ६४ करोड रुपियाँ विदेशी लगानी भित्र्याएको थियो ।

पछिल्ला पाँच वर्षमध्ये सन् २०१७ मा ऐतिहासिक रूपमै उच्च अर्थात् २३ अर्ब १६ करोड रुपियाँ विदेशी लगानी प्राप्त गरेको थियो । सन् २०१८ मा विदेशी लगानी व्यापक घटेर ७ अर्ब ८३ करोड रुपियाँमा सीमित भएको प्रतिवेदनमा उल्लेख छ ।

दक्षिण एसियाली मुलुकमध्ये सन् २०२० सबैभन्दा धेरै भारतले ६४ अर्ब डलर विदेशी लगानी भित्र्याएको छ । त्यसपछि बङ्गलादेशले दुई अर्ब ५६ करोड, पाकिस्तानले दुई अर्ब १० करोड, श्रीलङ्काले ४३ करोड, माल्दिभ्सले ३४ करोड डलर लगानी भित्र्याएका छन् ।

अफगानिस्तानले केवल एक करोड ३० लाख डलर मात्र लगानी भिœयाएको प्रतिवेदनमा उलेख छ । दक्षिण एसियाली मुलुकमध्ये सबैभन्दा कम भुटानमा ३० लाख डलर मात्र विदेशी लगानी भित्रिएको छ ।

भारतबाहेक अन्य सबै दक्षिण एसियाली मुलुकको सन् २०२० मा भित्रिएको विदेशी लगानी अघिल्लो वर्षको तुलनामा घटेको छ ।

गाउँ सहर संवाददाता

तपाईँको मत