वातावरण

मनसुन थप सक्रिय, पहाडी भू-भागमा पहिरोकाे जाेखिम, नदीनाला तथा खहरे खोलाहरुमा पानीको सतह बढ्न सक्ने

• गाउँ सहर संवाददाता
• १ असार मंगलबार, २०७८ | १५:४८:०० मा प्रकाशित

काठमाडाैँ । जल तथा मौसम विज्ञान विभाग मौसम पूर्वानुमान महाशाखाले विशेष मनसुन बुलेटिन-१ प्रकाशन गर्दै सचेत रहन अनुराेध गरेकाे छ ।

उसका अनुसार, हाल भारतको झारखण्डमा रहेको न्यून चापिय क्षेत्र र मनसुन न्यून चापिय रेखाको प्रभावका कारण मनसुन थप सक्रिय भएको छ । यसका कारण आज दिउसो र राती नेपालका धेरै स्थानहरुमा हल्का देखि मध्यम वर्षाको सम्भावना रहनुका साथै गण्डकी प्रदेश, लुम्बिनी प्रदेश र बागमती प्रदेशको केहि भू-भागमा भारी वर्षा र थोरै स्थानमा धेरै भारी वर्षा हुने सम्भावना रहेको छ ।

महाशाखाले भनेकाे छ - त्यसैले गण्डकी प्रदेश, लुम्बिनी प्रदेश र बागमती प्रदेशका पहाडी भू-भागमा पहिरो तथा गेग्रान बहाव (debris flow) को जोखिम रहेको, नदीनाला तथा खहरे खोलाहरुमा पानीको सतह बढ्न सक्ने तथा यातायात क्षेत्र प्रभावित हुन सक्ने भएकोले आवश्यक सतर्कता अपनाउनु हुन अनुरोध छ ।