स्वास्थ्य

१४ हजार ८१९ को परीक्षण गर्दा २ हजार ९१८ नयाँ कोरोना संक्रमित थपिए, ५३* जनाको निधन

• गाउँ सहर संवाददाता
• ३१ जेठ सोमबार, २०७८ | १७:०२:०० मा प्रकाशित

काठमाडौँ । नेपालमा कोरोनाभाइरसको सक्रिय संक्रमितको संख्या घट्दै गएको छ । दैनिक मृतकको संख्या घटेको छ । नयाँ थपिने संक्रमितको संख्यापनि कम भएको छ भने निको हुने दर बढेको छ ।

कोरोनाभाइरसको कारण नेपालमा पछिल्लो २४ घण्टामा ५३* जनाको मृत्यु भएको छ । यो *मृत्यु नेपाली सेनाद्वारा विभिन्न मितिमा शव व्यवस्थापन गरेका समेत हुन् । 

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा दुबै विधिबाट १४ हजार ८१९ को परीक्षण गरिएकोमा २ हजार ९१८ नयाँ संक्रमित थपिएका छन् । योसहित कुल संक्रमितको संख्या  पिसिआर विधिबाट ६ लाख १० हजार ५२१ र एन्टिजेन विधिबाट २१ हजार ३३९ पुगेको छ । 

मन्त्रालयका अनुसार पछिल्लो २४ घण्टामा ५ हजार १४७ जना निको भएका छन् । योसहित कुल निको हुनेको संख्या ५ लाख ३६ हजार  २५२ पुगेको छ । निको हुनेको प्रतिशत ८७.८ छ ।

मन्त्रालयका अनुसार अहिले देशभरमा ६५ हजार ८०४ सक्रिय संक्रमित रहेका छन् । मन्त्रालयका अनुसार देशभरका अस्पतालहरुमा ९९५ को आइसियूमा र ३२४ जनाको भेन्टिलेटरमा उपचार भइरहेको छ । उसका अनुसार अहिले होम आइसोलेशनमा रहनेको संख्या ६१ हजार १२२ र संस्थागत आइसोलेशनमा रहनेको संख्या ४ हजार ६८२ छ । क्वारेन्टाइनमा रहनेको संख्या ५३१ छ ।

पछिल्लो समय कोरोना कहर बढ्दै जाँदा कोरोनाको चेन ब्रेक गर्न धेरै स्थानहरुमा कडा निषेधाज्ञा जारी गरिएको छ भने काठमाडौँ उपत्यकामा केहि खुकुलो गरिएको छ ।

पछिल्लो २४ घण्टाको तथ्याँकले पनि २१ वर्षदेखि ६० वर्ष समूहमा सबैभन्दा बढी संक्रमण देखिएको छ । 

मन्त्रालयका अनुसार ४५ जिल्लाहरुमा संक्रमणको दर ५०० माथि छ ।