वातावरण

यस्ताे छ देशभरकाे माैसम पूर्वानुमान

• गाउँ सहर संवाददाता
• २७ चैत शुक्रबार, २०७७ | ०९:०६:०० मा प्रकाशित

काठमाडौं । जल तथा मौसम पूर्वानुमान महाशाखाका अनुसार प्रदेश १ तथा पहाडी क्षेत्रमा आंशिकदेखि सामान्य बदली रही देशका अरु क्षेत्रको मौसम सामान्यतया सफा रहने छ ।

स्थानीय वायु तथा पश्चिमी वायुको आंशिक प्रभावका साथै नेपाल भन्दा दक्षिणमा बनेको तल्लो वायुमण्डलीय न्यून चापीय प्रणालीको पनि प्रभाव रहेकाले केही क्षेत्रको मौसम प्रभावित हुने देखिएको हो ।

शुक्रबार दिउँसो प्रदेश १ लगायत अन्य प्रदेशका पहाडी भू–भागमा आंशिकदेखि सामान्य बदली रही बाँकी क्षेत्रको मौसम सामान्यतया सफा रहने छ ।

प्रदेश १ का थोरै स्थान र बाँकी प्रदेशका पहाडी भू–भागका एक–दुई स्थानमा अपरान्हपछि मेघ गर्जन र चट्टयाङ्गसहित हल्का वर्षाको सम्भावना छ ।

देशका पश्चिमी तथा मध्य पहाडी तथा तराईका केही भू–भागहरुमा हल्का तुँवालो समेत लाग्न सक्ने सम्भावना रहेको मौसमविदले बताएका छन् ।

यस्तै राति पहाडी भू–भागमा आंशिक बदली रही बाँकी क्षेत्रको मौसम सामान्यतया सफा रहने छ ।

देशका पहाडी भू–भागका एक–दुई स्थानमा मेघ गर्जन र चट्टयाङ्गसहित हल्का वर्षाको सम्भावना रहेको मौसमविदले बताएका छन् ।