गाउँ सहर

सर्वोच्चले संसद विघटनलाई सदर गरिदिन्छ कि बदर भन्नेमा सर्वत्र चासो, मुद्दाको पेसी आज ‘हेर्दाहेर्दै’मा

• गाउँ सहर संवाददाता
• ११ फाल्गुण मंगलबार, २०७७ | ०८:२८:०० मा प्रकाशित

काठमाडौं । अबकाे केही दिन सबैकाे ध्यान सर्वाेच्च अदालततिर देखिएकाे छ । प्रतिनिधिसभा विघटनविरुद्ध परेकाे मुद्दाकाे बहस सकिएपछि सर्वाेच्चकाे फैसलातिर कस्ताे आउला भन्नेतिर देखिएकाे छ ।  

 १३ वटा रिटमाथिको बहस गएको शुक्रबार सकिएसँगै फैसलाको प्रतिक्षा भइरहेको छ ।

सर्वोच्चले सोमबारसम्म बहस नोट पेश गर्ने समय दिएको थियो । सो समय सकिएसँगै मंगलबार (फागनु ११ गते) देखि मुद्दा हेर्दा हेर्दैमा गएको छ ।

प्रधानन्यायाधीश चोलेन्द्र शमशेर जबराले बहसको निर्णय मिति नतोकिएको भए पनि ११ गतेपछि जहिलेसुकै फैसला हुन सक्ने बताएका छन् ।

गएको पुस ५ गते प्रधानमन्त्रीको सिफारिसमा राष्ट्रपतिले संसद विघटनविरुद्ध परेका मुद्दामा संवैधानिक इजलासले माघ ४ गतेदेखि विषयबस्तु केन्द्रित भएर बहस सुन्दै आएको थियो ।

रिट निवेदकका तर्फबाट र विपक्षीका तर्फबाट दुई–दुई हप्ता बहस भएको थियो भने त्यसपछि एमिकस क्युरीले बसह गर्दै आएका थिए ।

सर्वोच्चले संसद विघटनलाई सदर गरिदिन्छ कि बदर भन्नेमा सर्वत्र चासो छ ।

पार्टीभित्रैबाट आफूलाई काम गर्न नदिइएको भन्दै प्रधानमन्त्री केपी शर्मा ओलीले गत पुस ५ गते संसद विघटन गरी आगामी वैशाख १७ र २७ गते दुई चरणमा मध्यावधि निर्वाचन गर्ने निर्णय गरेका थिए ।