राजनीति

अनेरास्ववियूकाे लालटिन जुलुस : ‘दिउँसै बाल्दा पनि भेटिएन है, संविधानमा संसद् विघटनको धारा खै ?’

• गाउँ सहर संवाददाता
• २२ पौष बुधबार, २०७७ | १३:२६:०० मा प्रकाशित

काठमाडौं । प्रधानमन्त्री केपी ओलीको संसद् भंग गर्ने निर्णयप्रति नेकपा (प्रचण्ड–माधव नेपाल) निकट अनेरास्ववियुले आज सडकमा लालटिन जुलुस निकालेको छ ।

प्रतिनिधिसभा भंग गर्ने प्रधानमन्त्री ओली र त्यसलाई सदर गर्ने राष्ट्रपति विद्यादेवी भण्डारीको कदमविरुद्ध नेकपा समर्थित अनेरास्ववियुले बुधबार दिउँसै लालटिन जुलुस निकालेको हो ।

जुलुसमा संविधानमा संसद् विघटन गर्ने धारा दिउँसै लालटिन बालेर खोज्दा पनि नदेखिएको भन्दै प्रधानमन्त्रीको कदमप्रति व्यंग्य गरिएको छ । ब्यानरमा लेखिएको छ, ‘दिउँसै बाल्दा पनि भेटिएन है, संविधानमा संसद् विघटनको धारा खै ?’

अनेरास्ववियुले प्रधानमन्त्री ओलीको पत्लादहन तथा मन्त्रीहरुविरुद्ध कालो झन्डा प्रदर्शन गर्ने कार्यक्रमअनुसार आज देशभर विरोध प्रदर्शन गरिरहेका छन् । आज अनेरास्ववियुले ओलीका मन्त्री मणि थापालाई जाजरकोटमा कालोझन्डा देखाएका थिए । थापा नेकपाको जिल्ला भेलालाई सम्बोधन गर्न जाजरकोट पुगेका थिए ।