यात्री
- अर्जुन दाहाल
- ५ असार मंगलबार, २०७५ | २१:५५:०० मा प्रकाशित
उ हाँसिरहेको छ,
आफ्नै बर्बादिमा,
त्यसैले आउ ए समाज,
थप दुई चार नयाँ घाउहरु,
रच नयाँ षडयन्त्रहरु,
माकुराको जालोसरि ।
किन हच्कन्छौ ?
यहाँ बोल्नेको पिठो बिक्छ ,
गाउँनेको सुर बिक्छ,
नाच्नेको ताल बिक्छ,
त्यसैले बेच आफुलाई,
अनि थप केही नयाँ घाउहरु उसलाई,
उ हेरिरहनेछ,
उ हाँसिरहनेछ ।
समाजवादले खोकृएको,
सभ्यताले लत्याइएको,
जुनकीरीझैँ कहिले बल्ने, कहिले निभ्ने,
उ एक अस्तित्वहिन मानिस,
आज पुन हाँसिरहेको छ,
आफ्नै बर्बादिमा,
खै काहाँ गए भाग्य लेख्ने ब्रह्मा ?
इतिश्री गर्ने गणेश ?
दर्शन भट्ट्याउने बुद्ध ?
अहँ छैनन यहाँ कोहि,
न त कहिल्यै भेटिनेछन?
कलियुगले डोर्याएको कुमालेको चक्रमा,
आउ ए समाज,
तिमी आफु पनि भिज,
अरुलाई पनि भिजाउ,
घुम , घुमाउ,
अनि फेरि बुन षड्यन्त्रको जालो,
थप्दै जाउ , एवम् रितले,
किन पालो पर्खन्छौ ?
जाइ लाग एकैपल्ट,
यहाँ विश्रामको आवश्यकता,
न त उसलाई छ , न त उसको समयलाई,
त्यसैले पुन थप्दै जाउ घाउहरु,
उ नतमस्तक भएर हाँसिरहनेछ,
हाँसिरहनेछ,
हाँसिरहनेछ......।।
प्रतिकृया दिनुहोस