अर्थतन्त्र

पछिल्लाे दुई महिनामा बैंकहरूले साढे १७ अर्ब बढी नाफा आर्जन गरे, कसले-कति कमाए ?

• गाउँ सहर संवाददाता
• ६ कार्तिक मंगलबार, २०८१ | ०९:४०:०० मा प्रकाशित

काठमाडौँ । चालु आर्थिक बर्ष २०८१/८२ को दुई महिनामा वाणिज्य बैंकहरूले साढे १७ अर्ब बढी नाफा आर्जन गरेका छन् ।

नेपाल राष्ट्र बैंकले सार्वजनिक गरेको तथ्याङ्क अनुसार चालु आर्थिक वर्षका दुई महिनामा अर्थात साउन र भदौँ महिनासम्मको अवधीमा हाल सञ्चालनमा रहेको २० वाणिज्य बैंकहरूले १७ अर्ब ६९ करोड २१ लाख रुपैयाँ नाफा आर्जन गरेका हुन् ।

बैंकहरूले दुई महिनाको अवधीमा कमाएको उक्त नाफा गत आर्थिक वर्ष २०८०/८१ को सोही अवधीको तुलनामा १ खर्ब ४ करोड अर्थात ६.३ प्रतिशतले बढी हो । गत आर्थिक बर्षको पहिलो दुई महिनामा यी बैंकहरुले १६ अर्ब ६४ करोड ८६ लाख रुपैयाँ नाफा कमाएका थिए । 

तथ्याङ्क अनुसार साउन र भदौ महिनामा नबिल बैंकले सबैभन्दा बढी अर्थात १ अर्ब ६६ करोड ८ लाख रुपैयाँ खुद नाफा आर्जन गरेको छ । यस्तै ग्लोबल आइएमई बैंकले चालु आवको दुई महिनामा १ अर्ब ५६ करोड ६१ लाख रुपैयाँ खुद नाफा आर्जन गरेको छ ।

भदौसम्मको तथ्याङ्क अनुसार नेपाल एसविआई बैंकले गत वर्षको तुलनामा सबैभन्दा धेरै नाफा बढाएको छ । यसैगरी कृषि विकास बैंकले पनि ४४ प्रतिशतले नाफा बढाएको छ भने प्रभु बैंकले ३७ प्रतिशत, सानिमा बैंकले ३४ प्रतिशत, सिटिजन्स बैंकले ३३ प्रतिशत र स्ट्यान्डर्ड चाटर्ड बैंकले २५ प्रतिशतले नाफा बढाएका छन् ।

दुई महिनाको अपधीमा एनआइसी एशिया बैंकले ५७ करोड ७५ लाख रुपैयाँ नाफा आर्जन गरेको छ । यस्तै, नेपाल बैंकले ६७ करोड ८२ लाख रुपैयाँ, हिमालयन बैंकले १ अर्ब १६ करोड ८१ लाख रुपैयाँ, कुमारी बैंकले १ अर्ब ८ करोड ५० लाख रुपैयाँ र नेपाल इन्भेष्टमेन्ट मेगाले १ अर्ब ४१ करोड २८ लाख रुपैयाँ नाफा आर्जन गरेको छ ।

तर २० वाणिज्य बैंकमा ६ वटा बैंकको भने नाफा घटेको छ । एनआइसी एशिया बैंकको नाफा २७ प्रतिशतले घटेको छ । कुमारी बैंक, हिमालयन बैंक, नेपाल बैंक र नेपाल इन्भेष्टमेन्ट मेगा बैंकको पनि नाफा ५ प्रतिशतले घटेको छ ।