गाउँ सहर

सिंहदरबार गेटमै मोटरसाइकलले ठक्कर दिँदा परराष्ट्रकी अधिकृतकाे निधन

• गाउँ सहर संवाददाता
• १८ कार्तिक शुक्रबार, २०७९ | ०९:४२:०० मा प्रकाशित

काठमाडाैं । परराष्ट्र मन्त्रालयकी अधिकृत आस्था सुब्बाको मोटरसाइकलको ठक्करबाट निधन भएको छ। सिंहदरबार पूर्वी गेट अघिल्तिर बाटो काट्दै गरेकी सुब्बालाई मोटरसाइकलले बिहीबार अपरान्ह ठक्कर दिएको थियो । 

हिजो बेलुका ६ बजेतिर प्रदेश-३ ०२ ००८ प ३६१७ नम्बरको मोटरसाइकलले ठक्कर दिँदा अनामनगर बस्ने ३२ वर्षकी आस्था सुब्बाको ज्यान गएको प्रहरीले जनाएको छ । दुर्घटनामा घाइते भएकी उनको उपचारका क्रममा काठमाडाैं मोडल अस्पतलामा बेलुका पौने सात बजे ज्यान गएको हो ।

दुर्घटनामा मोटरसाइकलका चालक घाइते भएका छन् । उनको महाराजगञ्जमा रहेको शिक्षण अस्पतालमा उपचार भइरहेको छ ।

सुब्बा २०६९ मा अधिकृत पदबाट परराष्ट्र सेवामा प्रवेश गरेकी थिइन् । उनले इजरायलस्थित नेपाली दूतावासको उपनियोग प्रमुख समेत भएर काम गरेकी थिइन् ।

उनी गत सेप्टेम्बरमा  संयुक्त राष्ट्रसंघीय महासभामा नेपालका तर्फबाट परराष्ट्र सचिव भरतराज पौड्यालले नेतृत्व गरेको टोलीको सदस्यका रूपमा न्युयोर्क पनि गएकी थिइन् । राष्ट्रसंघ महाशाखाअघि उनी राहदानी विभागमा कार्यरत थिइन् । 

उनका पति र नाबालक छोरा छन् ।