गाउँ सहर

सप्तकोसीको बाँध फुटेर गाउँ पस्याे, २० हजार मानिसहरु प्रभावित हुनसक्ने अनुमान

• गाउँ सहर संवाददाता
• १८ श्रावण बुधबार, २०७९ | ०९:३९:०० मा प्रकाशित

काठमाडाैं । अविरलको वर्षासँगै आएको बाढीपछि सप्तकोसी नदीको बाँध फुटेर उदयपुरकाे गाउँ पसेकाे छ । लगातारको वर्षासँगै आएको बाढीले उदयपुरको बेलका नगरपालिका-८ लाहुरे खोच डुम्रीबोटेमा सप्तकोसी नदीको बाँध फुटेको हाे ।

बुधवार बिहान ४ बजेतिर सप्तकोसी नदीको बाँध फुटेर गाउँ पसेको हो । नदी फुटेर गाउँ पसेसँगै बेलका नगरपालिका– २, ३, ८, ९ र बराहक्षेत्र नगरपालिका– ६ डुबानमा परेका छन् ।

नदीको बाँध फुटेर गाउँ पस्दा के कति क्षति भएको छ त्यसको यकिन तथ्यांक आउन बाँकी छ । 

प्रमुख जिल्ला अधिकारी बीरेन्द्रकुमार यादवका अनुसार कोशीको भंगालोबाट बेलकाका मात्रै २० हजार मानिसहरु प्रभावित हुनसक्ने अनुमान छ । प्रभावित क्षेत्रका बासिन्दालाई सुरक्षित स्थानमा सार्ने काम भइरहकाे उनले बताए ।

उनले सुनसरीका प्रमुख जिल्ला अधिकारीमार्फत कोशी ब्यारेजका बाँकी ढोका खोल्न आग्रह गरिएकोसमेत जानकारी दिए ।

लगातारको वर्षातका कारण पानीको बहाव बढेपछि कोसी ब्यारेजमा खतराको संकेत स्वरुप रातो बत्ती बालिएको छ । बुधबार बिहान सप्तकोसीमा पानीको बहाव प्रतिसेकेण्ड २ लाख २९ हजार १२५ क्युसेक पुगेको थियो । सप्तकोसीमा पानीको बहाव एक लाख ५० हजार क्युसेक नाघेपछि खतरा मानिन्छ ।