अर्थतन्त्र

सहकारी र शेयर तथा बचत सदस्यहरूलाई राष्ट्रिय सहकारी महासंघकाे ९ बुँदे अपिल

• गाउँ सहर संवाददाता
• १७ श्रावण मंगलबार, २०७९ | १५:५४:०० मा प्रकाशित

 

काठमाडाैं । राष्ट्रिय सहकारी महासंघले ९ बुँदे अपिल गरेकाे छ । एकपछि अर्को सहकारी संघ संस्थाहरू धमाधम आर्थिक सङ्कटमा फस्न थालेपछि राष्ट्रिय सहकारी महासंघले संयमित हुन र सचेत हुन आग्रहसहित ९ बुँदे अपिल गरेको हाे ।

मंगलबार ९ बुँदे अपिल जारी गर्दै महासंघले तरलता व्यवस्थापन गर्दै जोखिमयुक्त क्षेत्रमा लगानी नगर्न, कर्जा सुरक्षणको व्यवस्थापन गर्न, सहकारी मूल्य मान्यतामा चल्न र राष्ट्रिय सहकारी बैंक, केन्द्रीय, प्रदेश तथा जिल्ला स्तरीय संघहरुले आफ्ना सदस्य संस्थाहरूसँग नियमित सम्पर्क र समन्वय गरी संस्था सञ्चालनमा आवश्यक सहजीकरण गर्न आग्रह गरेको छ । 

कोभिड–१९ महामारी, रुस–युक्रेन युद्धसँगै वस्तु तथा सेवाहरूको मूल्यवृद्धि र मुद्रास्फीतिको असर समग्र अर्थतन्त्रमा पर्न गई बैंक तथा वित्तीय संस्थाहरूमा नै तरलता अभावको समस्या सिर्जना भएको र सोही समस्या सहकारी क्षेत्रमा समेत परेकाले सचेत र संयमित भएर मात्र आर्थिक कारोबार गर्न महासंघले अपिल गरेको छ ।