गाउँ सहर

बस दुर्घटनामा ज्यान गुमाएका परिवारलाई सुनापति गाउँपालिकाकाे आर्थिक सहयाेग

रामेछाप । रामेछापको सुनापति गाउँपालिकाले बस दुर्घटनामा मृत्यु भएका परिवारलाई आर्थिक सहयाेग उपलब्ध गराउने निर्णय गरेको छ ।

गाउँपालिकाले बस दुर्घटनाका मृतक परिवारलाई जनही ३० हजार रुपैयाँका दरले दाहसंस्कार खर्च उपलब्ध गराउने भएको हाे ।

हिजाे मंगलबार सुनापति गाउँपालिकाको केन्द्र हिलेदवीबाट काठमाडौंतर्फ जाँदै गरेको अरनिकाे यातायातकाे बा ३ ख ८३९६ नंम्बरकाे बस खनियापानी लुभुघाटमा दुर्घटना १३ जनाको मृत्यु भएकाे थियाे । सहयाेग रकम मृतक परिवारकाे घरघरमा पुगेर बितरण गर्न लागिएकाे पालिका अध्यक्ष ठूलाे कान्छा तामाङले बताए । 

अध्यक्ष तामाङले घाइतेहरूकाे उपचारकाे सम्पूर्ण खर्च अरनिकाे यातायात समितिले बेहाेर्ने जनाएकाे बताए ।

गाउँपालिकाका प्रमुख प्रशासकीय अधिकृत कमल श्रेष्ठले यातायात समितिबाट मृतक परिवारले पाउने क्षतिपूर्ति र घाइतेले पाउने उपचार सेवा छिटाे भन्दा छिटाे उपलब्ध गराउन पहल र अनुगमन गरिने बताए । 

पालिकाले दुर्घटनामा परेकाहरूकाे उद्धारका लागि खटिएका सुरक्षा निकाय, स्थानीय नागरिक, विभिन्न पार्टीका नेता तथा कार्यकर्ता, विभिन्न संघसंस्थाका व्यक्तिहरू, पत्रकार साथै एम्बुलेन्स उपलब्ध गराउनेप्रति धन्यबाद व्यक्त गरेकाे छ । 

गाउँ सहर संवाददाता

तपाईँको मत