राजनीति

कांग्रेस तीन सयभन्दा बढि स्थानमा विजयी भई सबैभन्दा अगाडी, अरू दलले कति जिते ?

काठमाडौं । स्थानीय तहको निर्वाचनमा नेपाली कांग्रेसका तर्फबाट प्रमुख-अध्यक्ष निर्वाचित हुने स्थानीय तहको सङ्ख्या तीन सय नाघेको छ । पछिल्लाे मत परिणामअनुसार कांग्रेसका उम्मेदवारहरूले ३०६ स्थानीय तहमा प्रमुख तथा अध्यक्ष पदमा विजय हासिल गरेका छन् । तीन सय बढि स्थानमा विजयीसँगै सबैभन्दा धेरै विजयी भएर धेरै पालिकामा विजयी हुनेमा कांग्रेस पहिलो पार्टी बनेको छ । 

नेपाल कम्युनिस्ट पार्टी (एमाले)ले २०७४ को स्थानीय चुनावमा जितेको भन्दा यस पटक नेपाली कांग्रेसले बढी स्थानीय तहमा जित हासिल गर्ने अवस्था देखिएको छ । एमालेले अहिलेसम्म नगरप्रमुख तथा गाउँपालिका अध्यक्ष पदमा १८७ उम्मेदवारलाई जिताउन सफल भएको छ । उपप्रमुख तथा उपाध्यक्ष पदमा कांग्रेसका तर्फबाट उम्मेदवारले २८१ स्थानमा जित हासिल गरेका छन् भने एमालेका २१२ जना उम्मेदवार नगर उपप्रमुख तथा गाउँपालिकाको उपाध्यक्ष पदमा निर्वाचित भएका छन् । 

नेपाल कम्युनिस्ट पार्टी (माओवादी केन्द्र) बाट ११७ स्थानमा प्रमुख र अध्यक्ष तथा १२१ स्थानमा उपप्रमुख र उपाध्यक्ष पदमा विजयी भएका छन् । चौथो दलका रूपमा जनता समाजवादी पार्टी आएको छ । सो पार्टीले २४ वटा नगरप्रमुख तथा अध्यक्षमा जित हासिल गरेको छ भने २६ स्थानमा उपप्रमुख तथा उपाध्यक्ष पदमा बाजी मारेको छ । 

नेपाल कम्युनिस्ट पार्टी (एकीकृत समाजवादी)ले हेटौँडा उपमहानगरपालिका प्रमुखसहित १७ स्थानीय तहमा प्रमुख तथा अध्यक्ष पदमा जित हासिल गरेको छ भने उपप्रमुख तथा उपाध्यक्ष पदमा २१ जनालाई जिताउन सफल भएको छ । लोकतान्त्रिक समाजवादी पार्टीले विशेष गरी मधेस प्रदेशका आफ्नो प्रभाव देखाएको छ । सो पार्टीका तर्फबाट उम्मेदवार भई जित्ने नगरप्रमुख तथा अध्यक्षको सङ्ख्या १० जना पुगेका छ भने उपप्रमुख तथा उपाध्यक्षको सङ्ख्या नाै जना पुगेको छ । 

कतिपय स्थानको मतगणना जारी रहेको छ भने कतिपय स्थानमा राजनीतिक दलहरूबीच सहमति हुन नसक्दा निर्वाचन सम्पन्न भएर पनि मतगणनाको कार्य सुचारु हुन सकेको छैन । 

गाउँ सहर संवाददाता

तपाईँको मत