स्वास्थ्य

देशभर ४४ जना काेराेना संक्रमित निको, थप ९ जनामा संक्रमण पुष्टि

• गाउँ सहर संवाददाता
• ३ बैशाख शनिबार, २०७९ | १६:५९:०० मा प्रकाशित

काठमाडौं । नेपालमा थप नौजनामा कोरोना संक्रमण पुष्टि भएको छ ।

पछिल्लो २४ घण्टामा चार हजार ४३ वटा स्वाब नमुनाको परीक्षण गरिएकोमा नौजनाको नतिजा पोजिटिभ आएको हो । एक हजार ९८६ नमुनाको पीसीआर परीक्षण गर्दा ६ र दुई हजार ५७ नमुनाको एन्टिजेन विधिबाट परीक्षण गर्दा तीनजनामा संक्रमण देखिएको हो ।

पछिल्लो २४ घण्टामा कोरोनाका कारण देशभर कसैको पनि मृत्यु पुष्टि भएको छैन । हालसम्म नेपालमा कोरोनाका कारण ११ हजार ९५१ जनाको मृत्यु भएको छ । केही दिनयता कोरोनाका कारण मृत्यु हुनेको संख्या थपिएको छैन ।

पछिल्लो २४ घण्टामा देशभर ४४ जना निको भएका छन् । योसँगै नेपालमा कोरोनामुक्त हुनेको संख्या नौ लाख ६६ हजार ३०३ पुगेको छ ।

हाल देशभर कोरोनाका सक्रिय संक्रमितको संख्या ४०० रहेको स्वास्थ्य तथा जनसंख्या मन्त्रालयले शनिबार जनाएको छ ।