गाउँ सहर

श्रीमतीले गरिन् श्रीमानकाे हत्या, स्वयंम् प्रहरीमा उपस्थित

• गाउँ सहर संवाददाता
• २८ चैत सोमबार, २०७८ | ११:४५:०० मा प्रकाशित

काठमाडाैं । श्रीमतीले श्रीमानकाे हत्या गरेकी छन् । कैलालीमा घरायसी विवादका क्रममा एक महिलाले श्रीमानको हत्या गरेकी हुन् । कैलालीको मोहन्याल गाउँपालिका–१ की ३२ वर्षीया फूमा थापा मगरले ४३ वर्षीय श्रीमान नारायण थापामगरको हँसियले हानेर हत्या गरेको जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) वेदप्रकाश जोशीले जानकारी दिएका छन् । 

‘सोमबार बिहान इलाका प्रहरी कार्यालय पण्डौनमा मैले श्रीमानको हत्या गरे भन्दै फूमा स्वयंम् उपस्थित भएपछि घटनाबारे थाहा भएको हो,’ डीएसपी जोशीले भने, ‘घटनाको अनुसन्धानका लागि इलाका प्रहरी कार्यालय लम्कीबाट प्रहरी निरीक्षक लोकेन्द्र गुरुको नेतृत्वमा टोली पठाइएको छ ।’

फूमाले प्रहरीलाई बताएअनुसार विगतदेखि नै उनीहरुबीच विवाद हुने गरेको थियो ।

घटनाका सम्बन्धमा थप अनुसन्धान गरिरहेकाे प्रहरीले बताएकाे छ ।