राजनीति

कांग्रेसबाट मन्थली नगरपालिकामा कार्कीले गरे उम्मेद्वारी दिने घाेषणा

• गाउँ सहर संवाददाता
• १४ चैत सोमबार, २०७८ | ०८:०४:०० मा प्रकाशित

रामेछाप । आसन्न स्थानीय निर्वाचनका लागि मन्थली नगरपालिकाकाे नगर प्रमुख पदमा नेपाली कांग्रेस जिल्ला कार्यसमिति सचिव विनाेद कार्कीले उम्मेदवारी दिने घाेषणा गरेका छन् ।

चनखुमा शनिबार भएको कार्यक्रममा कार्कीले मन्थली नगरपालिकाको प्रमुखमा उम्मेद्वारी दिने घाेषणा गरेका हुन् । मन्थली नगरपालिकामा प्रमुखका लागि दाबी गर्ने कार्की पहिलो उम्मेदवार हुन् ।

स्थानीय निर्वाचन नजिकिदै जाँदा जिल्लामा चुनावी माहाेल तातेकाे छ । टिकटकाे लागि रस्साकस्सी शुरू हुन थालेकाे छ । 

चनखु निवासी कार्की दुई पटक कांग्रेसको क्षेत्रीय सभापति भइसकेका व्यक्ति हुन् ।

उनी अघिल्लाे पटकका पनि उम्मेदवार हुन् तर कार्की उपविजेता भए । 

कांग्रेसका वर्तमान जिल्ला सचिव कार्कीको निर्वाचनमा गुप्त रूपमा माहौल बनाउने चलाख मानिन्छन् । कार्कीले टिकट पाएको अवस्थामा चिसापानी, पुरानागाउँ, चनखु, गेलु र फुलासी क्षेत्रमा अन्य उम्मेदवार भन्दा धेरै मत खस्ने आँकलन उनकाे छ ।

त्यस्तै भलुवाजोर, मन्थली, कठजोर, सालु, सुनारपानी, भटौलीमासमेत कार्कीको नगर प्रमुख उम्मेदवारी बारेको चर्चा उत्तिकै छ ।

कसलाई उम्मेदवार बनाउदा निर्वाचन जित्न सकिन्छ ? भन्ने कुराको लेखाजोखा चलिरहेकै बेला उनकाे उम्मेदवारी घोषणालाई अर्थपूर्ण रूपमा हेरिएकाे छ । 

नगरप्रमुख पदमा दाबी गर्दै कार्कीले जसरी जित्ने बताए । 

जिल्ला सभापति पूर्णवहादुर तामाङ (कान्छाराम ) ले गठबन्धन गर्ने निर्णय भएको खण्डमा पनि मन्थली नगरपालिकामा कांग्रेसले अरुलाई नछोड्ने बताउँदै आएका छन् । कांग्रेस एक्लै चुनावमा गएर भएपनि मन्थली नगरपालिकामा जित्ने तयारी कांग्रेसको छ ।