गाउँ सहर

नक्कली चिकित्सक पक्राउ

काठमाडाैं । प्रहरीले नक्कली चिकित्सकलाई पक्राउ गरेको छ  । महोत्तरीको बर्दिबासबाट नक्कली चिकित्सक पक्राउ गरेका हुन्  । बर्दिबासस्थित साँझा कान्तिपुर डेन्टल प्रा.लि. बर्दिबासका सञ्चालक दिलिप भनिने सञ्जय कुमार महतोलाई प्रहरीले पक्राउ गरेको जानकारी दिएकाे छ । 

इलाका प्रहरी कार्यालय बर्दिबासका प्रहरी निरीक्षक बालिष्ट सिंहका अनुसार उनलाई ईलाज सम्बन्धी कसुर मुद्दाको अनुसन्धानको शिलशिलामा पक्राउ गरिएको हो । दुई वर्ष अघि उनले धनुषा मिथिला नगरपालिका वडा नं.–९ की १९ वर्षीय रानी सिंह महतोको दाँत उखेलेका थिए ।

डाक्टर हुँ भन्दै उनको दाँत उखेल्दा अत्यधिक रक्तस्राव भएर रानीको  मृत्यु भएको थियो । ‘रानी दाँत दुखेर साँझा कान्तिपुर डेन्टल प्रा.लि.मा उपचारका लागि आएकी थिइन् । प्रतिवादी दिलिपले आफूसँग चिकित्सकको प्रमाण पत्र नै नभई,डाक्टर हुँ भनी उनको दाँत उखेलेका थिए ।

त्यसपछि अत्यधिक रक्तस्राव भई उनको मृत्यु भएको थियो’, प्रहरी निरीक्षक सिंहले बताए । घटनापछि फरार रहेका दिलिपलाई प्रहरीले महोत्तरी जिल्ला अदालतबाट पक्राउ पुर्जी जारी पश्चात् पक्राउ गरिएको हो । उनलाई बर्दिबास बजारबाट पक्राउ गरिएको प्रहरीले जनाएको छ ।

यस सम्बन्धमा थप अनुसन्धान भइरहेकाे प्रहरीले बताएकाे छ । 

गाउँ सहर संवाददाता

तपाईँको मत