राजनीति

सभापति देउवा –शेखरकाे लामाे समयपछि टेलिफाेन संवाद, भ्रातृ संस्था र चुनावी तालमेलबारे छलफल

• गाउँ सहर संवाददाता
• ९ चैत बुधबार, २०७८ | १३:४२:०० मा प्रकाशित

काठमाडाैं । बुधबार बिहान सभापति देउवाले शेखरलाई टेलिफोनमा सम्पर्क गरेका हुन् । दुई नेताबीच पार्टी सञ्चालनका विषयमा कुराकानी भएको बताइएको छ ।

सभापति शेरबहादुर देउवाज्यूले टेलिफोन गरेका थिए । उनीहरूबीच पार्टी सञ्चालन र भातृसंस्थाको तदर्थ समिति गठनका विषयमा कुराकानी भएको छ,” नेता कोइरालाका स्वकीयसचिव दिनेश थपलियाले भने, “शेखर कोइरालाले पार्टी मापदण्डका आधारमा न्यायपूर्ण सञ्चालन गरौँ, म तपाईंको हात बलियो बनाउन चाहन्छु भन्नुभएको छ ।”

जसमा जवाफमा देउवाले सबैलाई समेटेर छिट्टै भ्रातृ संस्थाहरूको तदर्थ समिति ल्याउने बताएका हुन् । महाधिवेशनपछि देउवाले शेखरसँग औपचारिक छलफलसमेत गरेका थिएनन् । दुवै नेताबीच लामो समयपछि संवाद भएकाे जनाइएकाे छ ।

गत मंसिरमा भएको कांग्रेस महाधिवेशनमा सभापति पदमा देउवा र कोइराला प्रतिस्पर्धामा उत्रिएका थिए ।

सभापति जितेपछि देउवाले कोइरालासँग संवाद नगरेको भन्दै आलोचना भइरहेको थियो ।

तीन दिनअघि शेखरले नै देउवासँग सम्पर्क गर्न चाहेका थिए । तर, त्यति बेला कुरा हुन सकेकाे थिएन । त्यसपछि विराटनगर गएका शेखरले देउवाले गरेको फोन ‘मिस’ गरेका थिए । काठमाडौं फर्किएपछि मंगलबार शेखरले फोन गरे पनि कुरा हुन नसकेपछि देउवाले आज बिहान ‘कलब्याक’ गरेकाे थपलियाले बताए ।