गाउँ सहर

युक्रेनमा संकटकाल घोषणा, स्थानीय बासिन्दाले छाड्न थाले राजधानी

• गाउँ सहर संवाददाता
• १२ फाल्गुण बिहीबार, २०७८ | १२:४७:०० मा प्रकाशित

काठमाडाैं । युक्रेनमा सङ्कटकालको घोषणा गरिएको छ । यहाँको सरकारले बिहीबार सङ्कटकालको घोषणा गरेको जनाएको हो । युक्रेनको सरकारले आजै मध्यरातिदेखि लागू हुनेगरी भनी देशभरका लागि सङ्कटकालको घोषणा गरेको हो । यो सङ्कटकाल ३० दिनका लागि घोषणा गरिएको छ ।

बुधबारको संसद् बैठकले सो सङ्कटकाल पास गरेको हो । सो संसदमा कायम रहेका ४५० जना सांसदमध्ये ३३५ जनाले सरकारले ल्याएको सङ्कटकालको पक्षमा मतदान गरेका थिए ।पूर्वी युक्रेनमा पछिल्लो समयमा रुसले सेना तैनाथ गरेको छ र युक्रेनमाथि रुसले हमला गर्ने योजना बनाएको बताउँदै आएको यस अवस्थामा रुसले युक्रेनमा सैन्य कारबाही सुरु गर्ने घोषणा गरेको छ ।

संयुक्त राष्ट्रसङ्घको सुरक्षा परिषदमा युक्रेन सङ्कटबारे छलफल चलिरहेको बेला रुसी राष्ट्रपति भ्लादिमिर पुटिनले सैन्य कारबाहीको घोषणा गरेका छन् । पछिल्लो समयमा युक्रेनमा तनाव बढेको छ । अमेरिका लगायतका केही पश्चिमा देशले युक्रेनबाट आफ्ना कूटनीतिक कर्मचारी र नागरिकहरु पनि फिर्ता लगेका छन् ।

किएभका बासिन्दाले राजधानी छोड्न थाले ।