वातावरण

काठमाडाैँलगायत देशका विभिन्न स्थानमा पूर्ण बदली, तराईका थोरै स्थानमा हुस्सु/कुहिरो

• गाउँ सहर संवाददाता
• ९ माघ आइतबार, २०७८ | ११:५२:०० मा प्रकाशित

काठमाडाैँ । आज काठमाडाैँलगायत देशका विभिन्न स्थानमा पूर्ण बदली छ । घाम लाग्न सकेकाे छैन । जल तथा मौसम विज्ञान विभाग मौसम पूर्वानुमान महाशाखाले सुदूरपश्चिम, कर्णाली र मधेसका  प्रदेशका भू-भागमा सामान्य देखि पूर्णतया बदली रही बाँकी प्रदेशका भू-भागमा सामान्य बदली रहेको बताएकाे छ । तराईका भू-भागका थोरै स्थानमा हुस्सु/कुहिरो लागेको छ ।

उसका अनुसार आज दिउँसो देशभर सामान्य देखि पूर्ण बदली रहने छ ।  लुम्बिनी, कर्णाली र सुदूरपश्चिम प्रदेशका केहि स्थानहरुमा मेघ/गर्जन चट्याङ्गसहित हल्का देखि मध्यम वर्षाको संभावना रहेको छ भने बांकी प्रदेशका थोरै स्थानहरुमा हल्का वर्षाको संभावना रहेको छ ।  कर्णाली र सुदूरपश्चिम प्रदेशका उच्च पहाडी तथा हिमाली भू-भागका धेरै स्थानमा साथै गण्डकी, बागमती र प्रदेश न १ का उच्च पहाडी तथा हिमाली भू-भागका केही स्थानमा हल्का देखि मध्यम हिमपातको संभावना छ ।

यस्तै राति देशभर सामान्य देखि पूर्ण बदली रहने महाशाखाले बताएकाे छ । सुदूरपश्चिम, कर्णाली र लुम्बिनी प्रदेशका केही स्थानहरुमा मेघ/गर्जन चट्याङ्गसहित हल्का देखि मध्यम वर्षाको संभावना रहेको छ भने बांकी प्रदेशका थोरै स्थानहरुमा हल्का वर्षाको संभावना रहेको छ । देशका उच्च पहाडी तथा हिमाली भू-भागका केही स्थानमा हल्का देखि मध्यम हिमपातको संभावना छ । 

विभागले बिहानको समयमा देशका तराई भू-भागका थोरै स्थानहरूमा कुहिरो/हुस्सु लाग्ने र अपरान्हपछि क्रमिक रुपमा सुधार हुँदै जाने सम्भावना रहेको बताउँदै चिसोबाट बच्न आवश्यक सुरक्षा र सतर्कता अपनाउनु हुन अनुरोध गरेकाे छ ।