स्वास्थ्य

काठमाडौं उपत्यकामा एकैदिन थपिए ६,३४३ संक्रमित, मुलुकभर संक्रमणदर हालसम्मकै उच्च

• गाउँ सहर संवाददाता
• ५ माघ बुधबार, २०७८ | १६:४४:०० मा प्रकाशित

काठमाडौं । काेराेना संक्रमण तीब्र रूपमा बढेसँगै काठमाडाैंमा संक्रमण दर उच्च विन्दुले बढेकाे छ । 

पछिल्लो २४ घण्टामा काठमाडौं उपत्यकामा ६ हजार ३४३ जना कोभिड–१९ संक्रमित थपिएका छन् । काठमाडौंमा चार हजार ६६६, भक्तपुरमा ५७८ र ललितपुरमा एक हजार १९ जना संक्रमित थपिएका हुन् ।

यस्तै पछिल्लो २४ घण्टामा देशभर ११ हजार ३५२ जनामा संक्रमण पुष्टि भएको छ भने ४ जनाको मृत्यु भएको छ ।

आज देशभरको औसत संक्रमणदर ५२.६ दर रहेको छ । यो हालसम्मकै सबैभन्दा उच्च संक्रमणदर भएको स्वास्थ्य तथा जनसंख्या मन्त्रालयले जनाएकाे छ ।

अहिले देशभर ४६ हजार ५१५ जना होम आइसोलेसनमा र एक हजार ४१४ जना संस्थागत आइसोलेसनमा छन् । तीमध्ये १६९ जना आईसीयूमा र २८ जना भेन्टिलेटरमा रहेको मन्त्रालयले बुधबार जनाएको छ ।