अर्थतन्त्र

दाेहाेराे अंकले घट्याे शेयर बजार, ८ अर्ब ४४ करोडको कारोबार

• गाउँ सहर संवाददाता
• ४ माघ मंगलबार, २०७८ | १५:२०:०० मा प्रकाशित

काठमाडाैं । शेयर बजार साताको कारोबारको तेस्रो दिन मंगलबार दोहोरो अंकले घटेको छ ।  आज नेप्से १०.७८ अंकले घटेर दुई हजार ९ सय ३६ दशमलब ६६ विन्दुमा पुगेको हो ।

कारोबार रकममा भने वृद्धि भएकाे छ । आज ८ अर्ब ४४ करोड ३४ लाख बराबरको कारोबार भएको छ । सोमबार ७ अर्ब ९० करोड १८ लाख बराबरको कारोबार भएको थियो ।  

नेप्सेका अनुसार आज दुई कम्पनीको शेयरमूल्यमा उच्च वृद्धि भएको छ । शेयर मूल्यमा उच्च वृद्धि हुने कम्पनीहरुमा सामलिङ पावर कम्पनी र मध्यभोटेकोशी जलविद्युत कम्पनी रहेको नेप्से जनाएकाे छ । आज सामलिङ पावर कम्पनीको शेयरमूल्य ९ प्रतिशत भन्दा बढीले बढेको छ भने मध्य भोटेकोशीको शेयरमूल्य आज ८ प्रतिशतले बढेर प्रतिकित्ता ४९६ रुपैयाँ पुगेको छ । 

आज मानुषी लघुवित्त वित्तीय संस्थाको शेयरमूल्यमा सर्वाधिक गिरावट आएको छ । यस कम्पनीको शेयरमूल्य ५ प्रतिशत भन्दा बढीले घटेको छ । कारोबारको आधारमा आज सबैभन्दा बढी अपी पावर कम्पनीको भएको छ । यस कम्पनीको आज २८ करोड ११ लाख भन्दा बढीको कारोबार भएको नेप्सेले बताएकाे छ ।