गाउँ सहर

जिल्ला अधिवेशनका कारण प्रदेश अधिवेशन रोकिदैन : निर्वाचन समिति

• गाउँ सहर संवाददाता
• १२ मङ्सिर आइतबार, २०७८ | १२:१६:०० मा प्रकाशित

काठमाडाैं । नेपाली कांग्रेसको १४ औँ महाधिवेशनअन्तर्गत जिल्ला तहको अधिवेशन भइरहेको छ । जिल्ला अधिवेशन नसकिए पनि प्रदेश महाधिवेशन हुने कि नहुने भनेर नेता कार्यकर्तामा अन्योल भइरहेका बेला केन्द्रीय निर्वाचन समितिले जिल्ला अधिवेशनका कारण प्रदेश अधिवेशन नरोकिने स्पष्ट पारेको छ । प्रदेश अधिवेशनका लागि अब चार दिन मात्रै बाँकी रहेको छ । 

हिजाे बसेको समितिको बैठकले तोकिएकै मितिमा प्रदेश अधिवेशन पूरा गर्ने गरी तयारी अघि बढाएको हो । समितिका सदस्य गोपालकृष्ण घिमिरेले जिल्ला अधिवेशन नसकिए पनि प्रदेश महाधिवेशन नरोकिने बताएका छन् ।

घिमिरेले भने, ‘हाम्रो प्राथमिकता जिल्ला अधिवेशन होइन, प्रदेश र केन्द्रीय महाधिवेशन हो, त्यसैले जिल्ला अधिवेशन नसकिए पनि प्रदेश अधिवेशन रोकिदैन ।’

संवैधानिक व्यवस्थाका कारण कांग्रेस मंसिर मसान्तभित्र आफ्नो प्रदेश र केन्द्रीय कार्य समितिका पदाधिकारीको चुनाव गरेर त्यसको विवरण निर्वाचन आयोगमा बुझाई सक्नुपर्छ । निर्वाचन समितिले मसान्तभित्रै पदाधिकारीको मत परिणाम आइसक्ने गरी निर्वाचन कार्यक्रमको तयारी अघि बढाएको छ ।

उनले समय कम भएकाले उपाय नभएको बताए । महाधिवेशन त गर्नै पर्ने अवस्था छ । उनले मंसिर २१ गते नै मनोनयन दर्ता भएर निर्वाचनको प्रक्रिया अघि बढाइने बताए । कांग्रेसको केन्द्रीय महाधिवेशन मंसिर २४ देखि २६ गतेसम्म गर्ने कार्य तालिका रहेकाे छ ।

२४ गते उद्घाटन भएपछि २५ गते नै मतदान गर्ने गरी तयारी भइरहेको समितिले जनाएको छ । केन्द्रीय महाधिवेशनअघि १६ र १७ गते प्रदेश महाधिवेशन हुँदैछ । हालसम्म ३६ जिल्लामा अधिवेशन भएको छ ।