गाउँ सहर

पेट्रोलियम पदार्थको मूल्यवृद्धिको विरोधमा विद्यार्थीले निकाले खाली सिलिन्डरसहित जुलुस

• गाउँ सहर संवाददाता
• २८ कार्तिक आइतबार, २०७८ | १५:५२:०० मा प्रकाशित

काठमाडौं । पेट्रोलियम पदार्थको मूल्यवृद्धिको विरोधमा विभिन्न राजनीतिक दलनिकट विद्यार्थी संगठनले सिलिन्डर बोकेर जुलुस निकालेका छन् । आइतबार दिउँसो काठमाडौंमा विद्यार्थीले प्रदर्शनीमार्गस्थित रत्नराज्यलक्ष्मी क्याम्पसबाट सिलिन्डर बोकेर जुलुस निकालेका हुन् ।

उनीहरूले सिलिन्डरमा ‘मलाई किन यति अमूल्य बनायौँ ? गरिब जनताको घरमा म कसरी बल्ने?’लगायत पोस्टर लेखेर टाँसेका थिए । सरकारले केही समयअघि खाना पकाउने ग्याँससहित पेट्रोलियम पदार्थको मूल्य बढाएको थियो ।

आजैमात्र विप्लव नेतृत्वको नेकपा निकट विद्यार्थीले पनि मूल्यबृद्धिको विरोधमा एक घण्टा चक्काजाम गरेका थिए । विप्लव नेतृत्वको नेकपाले ३० कात्तिकमा मूल्यबृद्धिको विरोधमा नेपाल बन्द गर्ने घोषणा गरेको छ ।