अर्थतन्त्र

सेयर बजार सुधारिने संकेत, काराेबार रकम भने न्यून

• गाउँ सहर संवाददाता
• २८ कार्तिक आइतबार, २०७८ | १५:२०:०० मा प्रकाशित

काठमाडौं । निकै उचार चढावकाबीच साताको पहिलो दिन आइतबार सेयर बजार नेप्से परिसूचक झिनो अंक घटेर बन्द भएको छ ।

केही दिनदेखि निरन्तर घटिरहेकाे शेयरबजार आइतबारकाे अवस्थाले रोकिएको संकेत गरेकाे छ । यसदिन बजार मापन गर्ने सूचक १.३८ अंकले घटेर परिसूचक २६८८.९२ बिन्दुमा रोकिएको छ ।

यस दिन नेप्से ओरालो लागेपनि ४ कम्पनीको शेयर सकारात्मक सर्किट लेभलमा कारोबार भएको छ । यस दिन बोटलर्स नेपाल (तराई), मानुषी लघुवित्त, तेह्रथुम पावर कम्पनी र महालक्ष्मी विकास बैंकको सकारात्मक सर्किट लेभलमा कारोबार भएको हो । 

यस दिन हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट कम्पनीको शेयर यस दिन नकारात्मक सर्किट लेभलमा कारोबार भएको छ । त्यसैगरी, यस दिन साहस उर्जाको शेयरमूल्य ८.७४ प्रतिशत घटेको छ ।

काराेबार भएका २३० कम्पनीको ७४ लाख ३४ हजार ५३७ कित्ता सेयर ४ अर्ब ९ करोड ६२ लाख १९ हजार ५२५ रुपैयाँको सेयर किनबेच भएको छ ।

यो दिन कारोबार रकमको आधारमा महालक्ष्मी विकास बैंक अग्रस्थानमा रहेको छ । बैंकको २७ करोड ३९ लाख ९३ हजार रुपैयाँ बढीको सेयर किनबेच भएको छ ।