राजनीति

संस्थापन इतर समूह सभापतिको साझा उम्मेदवार तय गर्न आन्तरिक छलफलमा जुट्दै

• गाउँ सहर संवाददाता
• १५ भदौ मंगलबार, २०७८ | १२:१३:०० मा प्रकाशित

काठमाडौं । नेपाली कांग्रेसको संस्थापन इतर समूह सभापतिको साझा उम्मेदवार तय गर्नका लागि आन्तरिक छलफलमा जुट्ने भएको छ ।

साझा उम्मेदवार तय गर्ने बारेको छलफलका लागि संस्थापन इतर समूहका नेताहरु वरिष्ठ नेता रामचन्द्र पौडेलको निवासमा भेला हुँदै छन् । पौडेलले आफ्नै निवासमा मंगलबार दिउँसो १ बजेका लागि बैठक बोलाएका हुन् ।

आउँदो महाधिवेशनमा प्रधानमन्त्री समेत रहेका शेरबहादुर देउवाविरुद्ध साझा उम्मेदवार चयन गर्नु पर्ने दबाबमा संस्थापन इतर समूह छ ।

सभापतिको उम्मेदवार बन्न रामचन्द्र पौडेलसहित शशांक कोइराला, शेखर कोइराला, प्रकाशमान सिंहसहितका नेताहरुले इच्छा व्यक्त गरेका छन् ।