गाउँ सहर

नाग मुर्ति स्थापना सहित विधिपूर्वक प्राणप्रतिष्ठा

• गाउँ सहर संवाददाता
• २९ श्रावण शुक्रबार, २०७८ | १४:४४:०० मा प्रकाशित

पोखरा ।  पोखरा महानगरपालिका वडा नं. १७ स्थित म्यूजियममार्गमा स्थापना गरिएको नाग मूर्तिको विधिपूर्वक प्राणप्रतिष्ठा गरिएको छ ।

स्थानीय धार्मिक व्यक्तित्वको सकृयता एवम् विभिन्न संघ संस्था, उद्योगी व्यवसायीको सामुहिक प्रयासबाट निर्माण गरिएको नागथानमा पाँच शिर भएका नागले शिवलिङ्गलाई वेरिएको नागमूर्ति स्थापना गरी प्राणप्रतिष्ठा गरिएको हो ।

शिवको महिना साउनको चौथो सोमवारदेखि प्रत्येक दिन बिहान सोडषोपचार विधिवाट पुजा आरधना एवम् साझ धुप आरती सहित शिलामा नाग भगवानलाई आव्हान गरिएको पूजा व्यवस्थापन समितिका संयोजक विष्णुप्रसाद पौडेलले जानकारी दिए । अव्यवस्थित एवम् सानो ठाउँमा दुई दशक अघि नागस्थान स्थापना गरी प्रत्येक नागपञ्चमीका अवसरमा पूजा गरिँदै आएको उनले बताए ।

नागमूर्ति सहित पूजा आरधना गर्नेका लागि आवश्यक ठाउँ, पानी, विद्युत सहितको एक दर्जन जनाको क्षमता भएको नागस्थान निर्माणका लागि कूल दुई लाख तीन हजार ११५ रुपैयाँ खर्च भएको नागथान निर्माण तथा व्यवस्थापन समितिका अध्यक्ष चेतनदास शर्माले जानकारी दिए ।