राजनीति

विपक्षी गठबन्धनमा सम्बद्ध प्रमुख पाँच संगठनका विद्यार्थीहरू सरकारविरूद्ध सडकमा

काठमाडाैं । विपक्षी गठबन्धन माउ पार्टीका पाँच विद्यार्थी संगठनले संयुक्त रूपमा प्रतिनिधि सभा विघटनविरूद्ध आज काठमाडौंमा प्रदर्शन गरेका छन् ।

प्रधानमन्त्री केपी शर्माको असंवैधानिक कदमको बिरोध गर्दै बिहीबार दिउँसो ३ बजे उपत्यकाको प्रदर्शनी मार्ग तथा देशका विभिन्न स्थानमा स्वास्थ्य मापदण्ड पालना गरी सामाजिक दूरी कायम गर्दै बिरोध प्रदर्शन गरेका हुन् ।

नेविसंघ महामन्त्री बलदेव तिमल्सिनाका अनुसार संयुक्त विद्यार्थी संगठनले संविधानको चीरहरण गरेर दोस्रो पटक प्रतिनिधिसभा विघटन गर्दै असंवैधानिक जगमा उभिएको प्रतिगामी सरकारले कोरोना कहरले आक्रान्त जनतालाई राहत र सहुलियत दिनुको सट्टा एकपछि अर्को राष्ट्रघात, कुशासन,महङ्गी र भ्रष्टाचार थोपरिरहेको त्यसकाे बिराेधमा उत्रिएकाे बताए ।

 

बिराेधमा कांग्रेस निकट नेविसंघ, माओवादी केन्द्रनिकट अखिल (क्रान्तिकारी), एमालेको माधव नेपाल समूहनिकट अनेरास्ववियु, जसपानिकट समाजवादी विद्यार्थी युनियन र राष्ट्रिय जनमोर्चानिकट अखिल (छैठौं)ले बिहीबार काठमाडौंको प्रदर्शनीमार्गमा विरोध प्रदर्शन गरेका छन् ।

प्रधानमन्त्रीले नेपाली जनताको त्याग,बलिदान र समर्पणको जगमा प्राप्त संघीय लोकतान्त्रिक गणतन्त्र, विधिको शासन र संविधानलाई तहसनहस बनाउने कार्य गर्दै आएको तिमल्सिनाले बताए । 

उनकाअनुसार शुक्रबार बिहान १० बजे फेरि प्रदर्शन गर्ने तयारी छ । प्रतिनिधि सभा विघटनलाई बदर गरिनुपर्ने माग उनीहरूको छ ।

गाउँ सहर संवाददाता

तपाईँको मत