अर्थतन्त्र

एनआईसी एशिया लघुवित्त वित्तका ग्राहकहरुलाई व्याजमा छुट

काठमाडाैं। हाल नेपालमा कोरोना भाइरसको संक्रमण रोकथाम गर्न लगभग नेपालभरि नै बन्दाबन्दीको अवस्था रहेको छ । वर्तमान बन्दाबन्दीको अवस्थाले मुलुकको उद्योग, कलकारखाना, व्यापार, व्यवसाय, पर्यटन लगायत वित्तीय क्षेत्रमा समेत गहिरो प्रभाव परिरहेको छ । 

यस असहज परिस्थितिमा आफ्ना सेवाग्राहीलाई केही मात्रामा भए पनि सहयोग गर्ने अभिप्रायले एनआईसी एशिया लघुवित्त वित्तीय संस्था लिमिटेडले २०७८ वैशाख मसान्तभित्र भुक्तानी गर्नुपर्ने सम्पूर्ण बक्यौता रकम (साँवा र ब्याज) वैशाख २४ गतेदेखि ३१ गतेसम्ममा बुझाउने ग्राहकलाई ब्याज रकममा १० प्रतिशत छुट प्रदान गर्ने योजना वैशाख तेस्रो सातामा सार्वजनिक गरेको थियो । 

सोही योजनाअनुसार वक्यौता तिर्ने १७९ शाखा कार्यालयका ४ हजार ६७६ ऋणी सदस्यहरुले संस्थालाई बुझाउनुपर्ने सम्पूर्ण रकम तोकिएको अवधिभित्र बुझाइ यस योजनामा सहभागी भएको संस्थाले जनाएको छ ।

उनीहरुले यस योजनामा सहभागी भएबापत ब्याजमा जम्मा १५ लाख १८ हजार २०२.४७ रुपैयाँ छुट प्राप्त गरेको पनि संस्थाले जनाएको छ । ‘ग्राहकहरुको ब्याज छुट रकम सम्बन्धित ऋणीको बचत खातामा जम्मा गरिसकेको छ’, संस्थाद्वारा जारी विज्ञप्तिमा उल्लेख छ । 

लघुवित्तले मुलुकभर ६९ जिल्लामा २४७ शाखा कार्यालय सेवा प्रदान गर्दै आइरहेको छ। 

गाउँ सहर संवाददाता