राजनीति

सत्ता साझेदारीका लागि एमाले र जसपा नेताहरूबीच बालुटारमा छलफल चल्दै

• गाउँ सहर संवाददाता
• १७ जेठ सोमबार, २०७८ | १०:२३:०० मा प्रकाशित

काठमाडौं । प्रधानमन्त्री एवम् नेकपा एमाले अध्यक्ष केपी शर्मा ओली र जनता समाजवादी पार्टीबीच बालुवाटारमा छलफल जारी छ । छफलमा दुवै पक्षका शीर्ष नेताहरु सहभागी छन् ।

बैठकमा जसपाका केन्द्रीय कार्य समितीका अध्यक्ष महन्थ ठाकुर लगायतका नेताहरु हुनुहुन्छ, उपेन्द्र यादव पक्ष भने सहभागी छैनन् ।

जसपामा एकले अर्को पक्षमाथि कारवाहीको तयारी समेत भइरहेका बेला एमाले र जसपा नेताहरुबीच सत्ता गठबन्धन बनाउनेबारे छलफल हुन लागेको हो । यसका साथै जसपाका अन्य मागको बारेमा पनि छलफल हुने बताइएको छ ।

जसपालाई ८ मन्त्रालय दिने समझदारी यसअघि नै भइसकेको छ । स्रोतका अनुसार ८ मन्त्री र दुई राज्यमन्त्री बन्ने गरि जसपाको ठाकुर पक्ष एमाले नेतृत्वको सरकारमा सहभागी हुँदैछ ।

नागरिकता अध्यादेश,मधेश आन्दोलनमा लागेका मुद्दा फिर्ता र संविधान संशोधन कार्यदल गठन भएपछि महन्थ ठाकुर पक्षले मधेशका माग एमालेले पूरा गरेको भन्दै सत्तामा सहकार्य हुने बताएको छ ।