वातावरण

यस्ताे छ बिहीबार मुलुकभरकाे माैसमी पूर्वानुमान्

• गाउँ सहर संवाददाता
• १४ पौष बिहीबार, २०७९ | ०७:१७:०० मा प्रकाशित

 

काठमाडाैं । हाल देशमा पश्चिमी न्यून चापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ। जसको प्रभावले प्रदेश १, गण्डकी प्रदेश, कर्णाली प्रदेश र सुदूरपश्चिम प्रदेशका पहाडी भू-भागमा आंशिक बदली रही तराईका केही भू-भागमा​ हुस्सु लागेको छ ।

केही दिन यता लगातार चिसो बढ्ने क्रममा छ । आज बिहान पौने ६ बजेको काठमाडौंको तापक्रम ५ डिग्री सेल्सियस रहेको छ । मौसमविद् बरुण पौडेलले बिहान पौने ६ बजे काठमाडौंको न्यनूतम तापक्रम ५ डिग्री सेल्सियस मापन गरिएको जानकारी दिए । 

आज  दिउँसो प्रदेश १ र सुदूर पश्चिम प्रदेशका पहाडी भू-भागमा आंशिक देखि सामान्य बदली रही बाँकी प्रदेशका पहाडी भू-भागमा आंशिक बदलीको अवस्था रहनेछ। प्रदेश १ को हिमाली भू-भागका एक-दुई स्थानमा हल्का हिमपातको सम्भावना रहेको छ । राति भने प्रदेश १  र सुदूरपश्चिम प्रदेशको  हिमाली भू-भागका एक-दुई स्थानमा हल्का हिमपातको सम्भावना रहेको छ ।

हिमाली भू-भागमा हिमपात र तराईका केही  भू-भागमा  हुस्सु लाग्दा दैनिक जीवन र सडक तथा हवाई यातायातमा प्रभाव पर्ने सम्भावना रहेकोले आवश्यक सावधानी अपनाउन महाशाखाले अनुरोध गरेको छ।