अर्थतन्त्र

चालू आवको पहिलो पाँच महिनामा वीरगञ्ज नाकाबाट ८८ अर्ब ६९ करोड राजस्व संकलन

काठमाडाैं । नेपालकाे मुख्य व्यापारिक नाका वीरगञ्जबाट गत पाँच महिनामा राजस्व संकलनमा राम्राे सुधार अाएकाे छ । गत आर्थिक वर्षको पहिलो पाँच महिनाको तुलनामा चालू आवको पहिलो पाँच महिनामा यस कार्यालयले ५२ प्रतिशत भन्दाबढी राजस्व संकलन गर्न सफल भएको छ ।

आर्थिक वर्ष २०७७/७८ को साउनदेखि मंसिर मसान्तसम्मको अवधिमा ५८ अर्ब १५ करोड ९९ लाख रुपैयाँ राजस्व संकलन गरिएकामा चालू आवको सोही अवधिमा ८८ अर्ब ६९ करोड ९२ लाख राजस्व संकलन भएको  छ । यो गत आवको सोही अवधिको तुलनामा रु ३० अर्ब ५३ करोड ९२ लाखले बढी राजस्व संकलन भएकाे हाे ।

भन्सार विभागलले चालु आवको सोही अवधिका लागि ८२ अर्ब ६१ करोड २५ लाख  रुपैयाँ राजस्व संकलनको लक्ष्य लिएको थियो । सोही अवधिमा कार्यालयले लक्ष्यभन्दा ६ अर्ब ८ करोड ६६ लाख रुपैयाँ बढी राजस्व संकलन गर्न सफल भएको विभागका सूचना अधिकारी सुमित गुप्ताले जानकारी दिएका छन् ।

उनका अनुसार देशकै प्रमुख व्यापारिक नाका वीरगञ्जबाट सवारीसाधन, इन्धन, औद्योगिक कच्चापदार्थलागयत वस्तुको आयात बढेकाले राजस्व संकलनमा सुधार देखिएको छ ।

गाउँ सहर संवाददाता