अर्थतन्त्र

माघ महिनामा झन्डै १५ अर्ब राजस्व असुली

• गाउँ सहर डेस्क
• ५ फाल्गुण बुधबार, २०७७ | १०:३०:०० मा प्रकाशित

वीरगञ्ज । मुलुकको प्रमुख भन्सार नाका वीरगञ्ज भन्सार कार्यालयले चालू आर्थिक वर्ष २०७७–०७८ को माघ महिनामा लक्ष्यभन्दा ८ प्रतिशत बढी राजस्व सङ्कलन गरेको छ ।
कोरोना महामारीले थलिएको उद्योग र व्यापारका गतिविधिले पछिल्लो समय गति लिएसँगै भन्सारबाट उठ्ने राजस्वमा वृद्धि भएको हो ।

अर्थ मन्त्रालय भन्सार विभागले वीरगञ्ज भन्सार कार्यालयलाई माघमा १३ अर्ब ८३ करोड रुपैयाँ राजस्व उठाउने लक्ष्य दिएकोमा लक्ष्यभन्दा १ अर्ब १२ करोड बढी राजस्व असुली गरेको छ ।

वीरगञ्ज भन्सारले माघ महिनामा मात्रै १४ अर्ब ९५ करोड रुपैयाँ राजस्व सङ्कलन गरेको प्रमुख भन्सार प्रशासक महेश आचार्यले जानकारी दिएका छन् ।

चालू आर्थिक वर्ष २०७७–७८ को ७ महिनामा वीरगञ्ज भन्सारले ८८ अर्ब ५० करोड रुपैयाँ राजस्व उठाएको प्रमुख भन्सार प्रशासक आचार्यले बताए ।

कोरोनाको कारण प्रभावित राजस्व असुली पछिल्ला महिनाहरूमा भने आयात निर्यात व्यापारमा सुधार आएसँगै लक्ष्य भन्दा बढी राजस्व असुली हुन थालेको आचार्यले बताएका छन् ।