राजनीति

निर्वाचनको तयारीलाई निरन्तर अघि बढाउन प्रधानमन्त्रीको निर्देशन

• गाउँ सहर डेस्क
• २७ माघ मंगलबार, २०७७ | १६:१३:०० मा प्रकाशित

काठमाडौँ । निर्वाचनको तयारीलाई निरन्तर अघि बढाउन प्रधानमन्त्रीले निर्देशन दिएका छन् । प्रधानमन्त्री केपी शर्मा ओलीले आगामी वैशाखमा हुने प्रतिनिधिसभा सदस्य निर्वाचनको हाल सम्मको तयारीका बारेमा निर्वाचन आयोगसँग जानकारी लिएका छन् ।

प्रधानमन्त्री ओली आज निर्वाचन आयोग गएरनिर्वाचन तयारीका बारेमा जानकारी लिएका हुन् । आयोगका पदाधिकारीहरूसँगको छलफलमा प्रधानमन्त्री ओलीले निर्वाचनको तयारीलाई निरन्तर अघि बढाउन निर्देशन दिएको छलफल पछि प्रधानमन्त्रीका प्रेस सल्लाहकार सूर्य थापाले जानकारी दिएका छन् ।

प्रधानमन्त्री ओलीले निर्वाचनका लागि सरकारले सुरक्षा व्यवस्था सहित श्रोत साधनको कुनै कमी हुन नदिने प्रतिबद्धता व्यक्त गर्नुभएको प्रेस सल्लाहकार थापाले बताए ।

आयोगले गरिरहेको निर्वाचनको तयारी सन्तोषजनक रहेको भन्दैँ प्रधानमन्त्री ओलीले आयोगप्रति धन्यवाद व्यक्त गरेका छन् ।

त्यस अवसरमा प्रमुख निर्वाचन आयुक्त दिनेशकुमार थपलियाले निर्वाचनका लागि आयोगले आवश्यक तयारी गरिरहेको र तोकिएको मितिमा निर्वाचन गर्न आयोग तयार रहेको जानकारी गराएका थिए ।

निर्वाचनको तयारीका बारेमा जानकारी लिन सरकारका तर्फबाट प्रधानमन्त्री ओली, उप–प्रधानमन्त्री ईश्वर पोखरेल, अर्थ मन्त्री विष्णुप्रसाद पौडेल र कानुन न्याय तथा संसदीय मामिला मन्त्री लिलानाथ श्रेष्ठ निर्वाचन आयोग गएका थिए ।