खेल

भारत–अस्ट्रेलिया क्रिकेट

• गाउँ सहर डेस्क
• २ माघ शुक्रबार, २०७७ | १५:३२:०० मा प्रकाशित

एजेन्सी । भारत र अस्ट्रेलियाबीचको अन्तिम टेस्ट क्रिकेटमा भारतले अन्तिम सत्रमा राम्रो पुनरागमन गरेको छ । ब्रिसबेनको गाब्बा मैदानमा पहिलो दिनको खेल सकिँदा अस्ट्रेलियाले ५ विकेटको क्षतिमा २७४ रन बनाएको छ ।

पटक पटक जीवनदान पाएका मार्नस लाबुसानेको १०८ रनको मद्दतले अस्ट्रेलिया ठूलै स्कोरतर्फ अग्रसर भएको हो । अस्ट्रेलियाका अन्य खेलाडीहरुमा डेभिड वार्नरले १, मार्कस ह्यारिसले ५, स्टिभेन स्मिथले ३६ र म्याथ्यु वेडले ४५ रन बनाए । क्यामरुन ग्रीन २८ र कप्तान टिम पेन ३८ रन बनाएर खेलिरहेका छन् ।

यसअघि भएका तीन खेलमध्ये दुबै टिमले १–१ खेल जितेर बराबरीमा रहेको छ । एक खेल भने बराबरीमा समाप्त भएको थियो । बोर्डर–गावस्कर ट्रफी जित्न यो टेस्ट अस्ट्रेलियाले जित्नुपर्ने हुन्छ ।

भारतका प्रमुख बलरहरु जसप्रित बुमराह र रविचन्द्रन आश्विन घाइते भएकाले दुई जना नयाँ खेलाडीले यस टेस्टमा मौका पाएका छन् । अर्का तिब्र गतिका भारतीय बलर नवदीप सैनी पनि चोटका कारण दोस्रो सत्रबाट मैदानमा आएका छैनन् ।