गाउँ सहर

एन आई सी एशिया लघुवित्त र स्वदेशी लघुवित्त मर्जर हुने

• गाउँ सहर डेस्क
• १० पौष शुक्रबार, २०७७ | १६:११:०० मा प्रकाशित

काठमाडौँ । एन आई सी एशिया लघुवित्त वित्तीय संस्था लि.र स्वदेशी लघुवित्त वित्तीय संस्था लि. मर्जर हुने भएका छन् । उत्क्त संस्थाहरूबीच मर्जर सम्बन्धी सम्झौतापत्रमा हस्ताक्षर भएको छ ।  कर्णाली प्रदेशको विकट जिल्ला जाजरकोटमा रजिष्टर्ड कार्यालय भई काभ्रेपलाञ्चोक जिल्लाको बनेपामा कर्पोरेट कार्यालय रहेको एन आई सी एशिया लघुवित्त वित्तीय संस्था लिमिटेड र प्रदेश १ स्थित सुनसरी जिल्लाको इटहरीमा रजिष्टर्ड कार्यालय रहेको स्वदेशी लघुवित्त वित्तीय संस्था लिमिटेड मर्जर हुने भएका हुन्  । आज एक समारोहका बीच सम्झौता पत्रमा हस्ताक्षर भएको हो । मर्जर हुने यी दुबै संस्थाहरु नेपाल राष्ट्र बैंकबाट “घ” वर्गको इजाजत पत्र प्राप्त राष्ट्रियस्तरका संस्थाहरु हुन ।

२०७७ श्रावण ३२ गते दुई संस्था बिच मर्जर सम्बन्धी समझदारीपत्रमा हस्ताक्षर भएको थियो । २०७७ कार्तिक १९ गते नेपाल राष्ट्र बैंकबाट सैद्धान्तीक सहमति प्राप्त भएको र आज पौष १० गते मर्जर गर्ने सम्बन्धी अन्तीम समझौता भएको जनाइएको छ । उक्त सम्झौतामा एन आई सी एशिया लघुवित्त वित्तीय संस्था लिमिटेडको तर्फबाट संस्थाका अध्यक्ष श्री कपिल ढकाल र स्वदेशी लघुवित्त वित्तीय संस्था लिमिटेडको तर्फबाट संस्थाका अध्यक्ष श्री लालमणी जोेशीले हस्ताक्षर गरेका छन् ।

एन आई सी एशिया लघुवित्त वित्तीय संस्था लिमिटेडको कर्णाली प्रदेश लगायत मुलुकका विकट पहाडी तथा हिमाली जिल्लाहरुमा समेत गरी कूल १२० शाखा संचालनमा रहेका छने । स्वदेशी लघुवित्त वित्तीय संस्था लिमिटेडको नेपाल भरि ८५ शाखा संचालनमा रहेका छन् । मर्जर पश्चात कुल शाखा संख्या १९३ शाखा भएका छन् ।मर्जर सम्बन्धी सम्पूर्ण कार्य

सम्पन्न गरी मर्जर पश्चात् एन आई सी एशिया लघुवित्त वित्तीय संस्था लिमिटेडको नामबाट देशकै सबै भन्दा ठूलो शाखा संजाल र चुक्ता पूँजी भएको एक सबल सक्षम एवं विश्वसनीय लघुवित्त वित्तीय संस्थाको रुपमा स्थापित हुने सम्झौता पत्रमा उल्लेख छ । त्यस्तै उत्तरदायी लघुवित्तीय सेवाको अभ्यास गर्दै आएको एन आई सी एशिया लघुवित्त वित्तीय संस्थाले वित्तीय समावेशिकरणका लागि बैंक तथा वित्तीय संस्थाहरुको उपस्थिति न्युन रहेको दुर्गम जिल्लाहरुमा शाखा विस्तार गरी सेवा सञ्चालन गर्दै आएको र आगामी दिनहरुमा पनि सोहि अनुरुप कार्य गर्ने बताएको छ ।