चितवनको माडीमा अयोध्याधाम गुरुयोजना सहितको डीपीआर तयार
- गाउँ सहर डेस्क
- २ पौष बिहीबार, २०७७ | ११:०७:०० मा प्रकाशित
चितवन । चितवनको माडीमा अयोध्याधाम निर्माण गर्न गुरुयोजना सहितको विस्तृत परियोजना प्रतिवेदन (डीपीआर) तयार भएको छ । डेकोर स्टुडियो प्रालिले अयोध्याधामको गुरुयोजना सहितको डीपीआर बनाएको सो संस्थाका निर्देशक मनोज गुप्ताले जानकारी दिएका छन् ।
प्रधानमन्त्री कार्यालय, संस्कृति, पर्यटन तथा नागरिक उड्डयन मन्त्रालय र माडी नगरपालिकाको समन्वयमा गुरुयोजना सहितको डीपीआर तयार गरिएको हो । त्यहाँ निर्माण हुने मन्दिरहरूको नक्सासमेत बनाइएको गुप्ताले जानकारी दिए । अयोध्याधामको गुरुयोजनाअनुसार काम सम्पन्न गर्न दुई अर्ब ५० करोड रुपियाँदेखि तीन अर्ब रुपियाँसम्म खर्च लाग्ने प्रक्षेपण गुरुयोजनामा उल्लेख गरिएको छ । गुरुयोजनाअनुसार काम सम्पन्न भए २—३ वर्ष लाग्ने बताइएको छ ।
भगवान् श्रीरामको भव्य मन्दिर निर्माणका साथै राजा दशरथले राज्य सञ्चालन गरेको दरबार, धर्मशाला, घोडसार, उद्यान तथा आधुनिक बसपार्क, विवाह मण्डप, वाल्मीकि आश्रम निर्माण गुरुयोजनामा समेटिएको छ । यस्तै लक्ष्मण वाटिका, अशोक वाटिका, जटायु पार्क, वाल्मीकि आश्रम निर्माणलाई पनि गुरुयोजनामा समेटिएको छ । नेपालका चारै धाम पशुपति, वराह, मुक्तिनाथ र रिडीको मन्दिर निर्माणलाई पनि गुरुयोजनामा समावेश गरिएको छ । अयोध्याधामको चरणबद्ध विकास गर्ने योजनाअनुरूप पहिलो चरणमा राम, सीता, लक्ष्मणको मन्दिरसँगै गणेश र भगवतीको मन्दिर निर्माण अगाडि बढाउन प्रस्ताव गरिएको छ ।
२०७८ सालको रामनवमीका दिन भगवान राम, सीता र लक्ष्मणको मन्दिर अनावरण गर्ने गरी निर्माण योजना अगाडि बढाउन प्रधानमन्त्री केपी शर्मा ओलीको निर्देशन रहेको माडी नगरपालिकाका प्रमुख ठाकुर ढकालले जानकारी दिए ।
“२०७८ सालको चैतमा पर्ने रामनवमीका दिनमा अनावरण गर्ने गरी भगवान् राम, सीता, लक्ष्मण र हनुमानको मूर्ति निर्माण कार्यलाई तीव्रता दिइनेछ”, नगर प्रमुख ढकालले भने ।
अयोध्याधाम निर्माणका लागि माडी नगरपालिकाले एक सय बिघा जग्गा हस्तान्तरण गर्ने निर्णय गरिसकेको छ । यस्तै नगरपालिकाको वडा नंम्बर ८ मा रहेको थप ५० बिघा जग्गा पनि अयोध्याधामलाई उपलब्ध गराउने निर्णय नगरपालिकाले गरिसकेको छ । नगरपालिकाले उपलब्ध गराएको जग्गामै अयोध्याधाम बनाउने प्रक्रिया सुरु गरिएको हो ।
गाउँ सहर डेस्क
डेस्क गाउँ सहर डटकम टीमकाे टेवलवर्क हाे ।
- यसकारण पक्राउ परे दिल्लीका मुख्यमन्त्री अरविन्द केजरीवाल
- सरस्वतीलाई पानीमा र कमलको फूलमाथि नै किन देखाइन्छ ?
- नेपालमा २०.२७ प्रतिशत जनता गरिबीको रेखामुनि
- प्रतिपक्षी दलले बहिष्कार गरेकाे चुनावमा शेख हसिना विजयी, चौथो पटक प्रधानमन्त्री बन्ने
- विदेशिने विद्यार्थी तथा युवालाई यसरी सकिन्छ राेक्न
- आज विश्व माटो दिवस : यसकारण जोगाऔं माटो
- जाडाेमा एमालेले मध्य पहाडी लोकमार्गमा थालेकाे पदयात्राकाे सन्देश
- काठमाडाैं उपत्यकामा ‘निषेधाज्ञै निषेधाज्ञा’
- विश्वकप उपाधिका लागि आज भारत र अस्ट्रेलिया भिड्दै, बिजेता र उपबिजेताले कति रुपैयाँ पाउँछन् ?
- बहुउपयोगी गाई पुज्नुकाे महिमा, वैज्ञानिक, धार्मिक र व्यवहारिक महत्वका विविध पक्ष
प्रतिकृया दिनुहोस