कृषि विकासका लागि तीनवर्षे रणनीतिको थालनी
- गाउँ सहर डेस्क
- २३ मङ्सिर मंगलबार, २०७७ | ११:४३:०० मा प्रकाशित
भैरहवा । कृषि तथा पशुपक्षी विकासमन्त्री घनश्याम भुसालले कृषिको विकासका लागि सरकारले तीन वर्षे रणनीति बनाएर कामको थालनी गरेको बताएका छन् ।
भैरहवामा सोमबार आधुनिक हाटबजारको शिलान्यास गर्दै मन्त्री भुसालले तीन वर्षे रणनीति अनुसार काम गर्दा कृषि क्षेत्रमा आमूल परिवर्तन आउने विश्वास व्यक्त गरे ।
उनले कृषिको बजेटको ठूलो हिस्सा स्थानीय तहसम्म पठाउने बताए । अहिले पौने पाँच अर्ब बजेट तल पठाएका छौँ । एक महिनाभित्र प्रत्येक पालिकामा भण्डारण गर्न मिल्नेगरी गोदाम बनाउन थप एक अर्ब पठाउने तयारी गरेका छौँ, मन्त्री भुसालले भने । उनले अहिलेसम्मको परिणामले सन्तुष्ट नभएको र अब कृषि मन्त्रालयले राम्रो कामको थालनी गरेको बताए ।
मुलुककै दोस्रो ठूलो नाका, अन्तर्राष्ट्रिय विमानस्थल, लुम्बिनी लगायतका कारण भैरहवाको विकासले फड्को मार्नुपर्नेमा तुलनात्मक रूपमा विकास पछाडि परेको उनको भनाइ थियो । यस क्षेत्रको बृहत् विकासका लागि योजना बनाएर आउन उनले निजी क्षेत्रलाई आग्रह समेत गरे ।
मन्त्री भुसालले अहिले ग्रामीण क्षेत्रको जनशक्तिले विदेशमा श्रम खेर फालिरहेको जिकिर गर्दै कृषिबाट नै विदेशमा जाने जनशक्ति रोक्ने प्रयास थालेको बताए । अहिले कृषि मन्त्रालय पाँचवटा नीतिगत योजनाका साथ अगाडि बढेको पनि मन्त्री भुसालले जानकारी दिए । कृषि उपज खरिद, यसको भण्डारण लगायतमा लगानी गरिने बताउँदै मन्त्री भुसालले यो वर्ष करिब दुई लाख मेट्रिक टन भण्डारण गर्नसक्ने गरी तयारी गरेको बताएका छन् । स्थानीय सरकारलाई बलियो बनाएर मल वितरण, कृषि उपज सङ्कलन लगायतको काम गर्नसक्ने गरी तयारी गरिएको छ । कृषि बजारलाई आधुनिकीकरण गर्ने उद्देश्यसहित भैरहवामा निर्माण हुने आधुनिक कृषि भवनले कृषिको विकासमा मद्दत पुग्ने छ, उनले भने ।
सामुदायिक पूर्वाधार विकास आयोजना अन्तर्गत भैरहवामा रहेको हाटबजार लाग्ने ठाउँमा ब्लक बी अन्तर्गत आधुनिक भवन निर्माण सुरु भएको हो । २४ करोड २७ लाख ४८ हजार ४४९ रुपियाँ लागत अनुमान गरिएको भवन निर्माण गर्न विकास एन्ड ब्रदर्स आत्रेय र बस्नेत जेभी सिनामङ्गलले ठेक्का पाएको छ ।
२०७९ साल असार १६ सम्मको म्यादभित्र निर्माण हुने ६ तले भवनमा चिस्यान केन्द्रदेखि आधुनिक कृषि बजार, रेस्टुरेन्ट, सिनेमा हल लगायतको सुविधा रहने सिद्धार्थनगर नगरपालिकाका प्रमुख हरिप्रसाद अधिकारीले जानकारी दिए । सिद्धार्थनगर नगरपालिका–१३ मा यसअघि नै करिब १३ करोड रुपियाँको लागतमा कृषि बजार निर्माणाधीन अवस्थामा रहेको छ ।
गाउँ सहर डेस्क
डेस्क गाउँ सहर डटकम टीमकाे टेवलवर्क हाे ।
- यसकारण पक्राउ परे दिल्लीका मुख्यमन्त्री अरविन्द केजरीवाल
- सरस्वतीलाई पानीमा र कमलको फूलमाथि नै किन देखाइन्छ ?
- नेपालमा २०.२७ प्रतिशत जनता गरिबीको रेखामुनि
- प्रतिपक्षी दलले बहिष्कार गरेकाे चुनावमा शेख हसिना विजयी, चौथो पटक प्रधानमन्त्री बन्ने
- विदेशिने विद्यार्थी तथा युवालाई यसरी सकिन्छ राेक्न
- आज विश्व माटो दिवस : यसकारण जोगाऔं माटो
- जाडाेमा एमालेले मध्य पहाडी लोकमार्गमा थालेकाे पदयात्राकाे सन्देश
- काठमाडाैं उपत्यकामा ‘निषेधाज्ञै निषेधाज्ञा’
- विश्वकप उपाधिका लागि आज भारत र अस्ट्रेलिया भिड्दै, बिजेता र उपबिजेताले कति रुपैयाँ पाउँछन् ?
- बहुउपयोगी गाई पुज्नुकाे महिमा, वैज्ञानिक, धार्मिक र व्यवहारिक महत्वका विविध पक्ष
प्रतिकृया दिनुहोस